Գերմանիայի կանցլեր Օլաֆ Շոլցը հայտարարել է, որ չնայած իր նախարարների բոլոր գործողություններին, ինքը բավականին լավ է քնում և չի ակնկալում, որ իր կառավարության որևէ մեկը «կբացի Պանդորայի արկղը»,-գրում է РИА новости-ն:
Շոլցը հինգշաբթի երեկոյան հանդիպել է իր համաքաղաքացիների հետ Գերմանիայի Հեսսեն դաշնային երկրամասի Մարբուրգ քաղաքում։ Հանդիպման մասնակիցներից մեկը հարց է ուղղել կանցլերին այն կապակցությամբ, որ ԳՖՀ-ի նախարարների կաբինետը «ոչ մի կերպ չի հանդարտվի». պաշտպանության նախարար Քրիստինա Լամբրեխտը հրաժարական է տվել, այնուհետև՝ Գերմանիայի ԱԳ նախարար Աննալենա Բերբոկի արտահայտությունները «Ռուսաստանի դեմ պատերազմի» մասին, որոնք մոլորության մեջ են գցել, իսկ այժմ նաև ներքին գործերի նախարար Նենսի Ֆեզերի ցանկությունը՝ պայքարելու Հեսսեն երկրի վարչապետի պաշտոնի համար: Տղամարդը կցանկանար իմանալ, արդյոք Շոլցն առավոտյան չի մտածում, երբ արթնանա, թե իր նախարարներից ով է այս անգամ «բացելու Պանդորայի արկղը»։
«Ոչ... չնայած բոլոր դժվար ժամանակներին, մեծ մասամբ ես բավականաչափ լավ եմ քնում և ուրախությամբ եմ նայում առաջիկա օրվան», - ասել է Շոլցը։ Զրույցը ուղիղ եթերով հեռարձակել է Գերմանիայի կառավարության պորտալը։
Նա հավելել է, որ այժմ Գերմանիան կանգնած է բարդ մարտահրավերների առջև, որոնց դեպքում նրան լավ մարդիկ են պետք։ Նա նաև նշել է, որ իր ներքին գործերի նախարարին Ֆեզերը համարում է պրոֆեսիոնալ, որը լավ է կատարում իր աշխատանքը։ Նրա խոսքով՝ ինքը կարող է հասկանալ նրանց, ովքեր կցանկանային նրան տեսնել Հեսսենի վարչապետի պաշտոնում, «նա ամեն օր ամեն ինչ կանի հանուն իր խնդիրների կատարման»: