ՀՀ քննչական կոմիտեի զինվորական քննչական գլխավոր վարչության ութերորդ կայազորային քննչական բաժնում ՀՀ քրեական օրենսգրքի 44-155-րդ հոդվածի 1-ին մասով նախաձեռնվել է քրեական վարույթ՝ հակառակորդի կողմից զինծառայողի նկատմամբ սպանության փորձի դեպքի առթիվ: Այս մասին հայտնում են ՀՀ ՔԿ-ից:
Նախնական տվյալներով՝ 2023թ. հունվարի 19-ին՝ ժամը 10:50-ի սահմաններում, ՀՀ ՊՆ N զորամասի պահպանության շրջանի մարտական դիրքում պայմանագրային զինծառայող Ե. Շ.-ն հակառակորդի կողմից արձակված կրակոցից աջ ազդրի շրջանում ստացել է հրազենային վիրավորում:
Կատարվում է նախաքննություն:
Հիշեցնենք, որ այսօր՝ հունվարի 19-ին՝ ժամը 10:50-ի սահմաններում, Երասխի ուղղությամբ տեղակայված մարտական դիրքում հակառակորդի կրակոցից հրազենային վիրավորում է ստացել ՀՀ ՊՆ N զորամասի զինծառայող Ե.Շ.-ն։ Ավելի վաղ ՊՆ-ն հայտնել էր, որ զինծառայողի վիճակը գնահատվում է ծանր: Հավելենք, որ դեպքի հանգամանքները լիարժեք պարզելու նպատակով տարվում է քննություն:
Ավելի ուշ ՀՀ ՊՆ խոսնակ Արամ Թորոսյանը Armenia Today-ին հայտնել է, որ հակառակորդի կրակոցից հրազենային վիրավորում ստացած զինծառայողին զինվորական բժիշկները վիրահատել, և այդ պահի դրությամբ նրա կյանքին վտանգ չի սպառնում: