Անկարան, Երևանի հետ հարաբերությունների կարգավորման գործընթացում, հայկական կողմից ակնկալում է անկեղծություն «ոչ միայն խոսքով, այլև գործով», ասել է Թուրքիայի արտգործնախարար Մևլութ Չավուշօղլուն՝ ԱՄՆ-ում հայրենակիցների հետ հանդիպմանը, հայտնում են թուրքական լրատվամիջոցները։
«Հուսով եմ՝ Հայաստանն անկեղծ քայլեր կձեռնարկի դեպի խաղաղություն։ Ցավոք սրտի, բանակցությունների առումով մենք վերջին շրջանում նկատում ենք հետընթաց քայլեր։ Բլինքենն ասել է, որ Փաշինյանն անկեղծ է, բայց մենք ուզում ենք սա տեսնել ոչ թե խոսքով, այլ գործով»,- շեշտել է թուրք նախարարը։
Չավուշօղլուն հիշեցրել է Թուրքիայի և Հայաստանի միջև հարաբերությունների կարգավորման գործընթացը։ «Ես կարող եմ բացահայտ հայտարարել, այդ թվում՝ եղբայրական Ադրբեջանի անունից. Անկարան և Բաքուն անկեղծորեն հակված են Երևանի հետ հարաբերությունների կարգավորմանը»,- ասել է նա։
Հունվարի 18-ին ԱՄՆ պետքարտուղար Էնթոնի Բլինքենը ՀՀ վարչապետ Նիկոլ Փաշինյանի հետ քննարկել էր Ադրբեջանի հետ երկկողմ բանակցությունները վերսկսելու քայլերը։
Ավելի վաղ Հայաստանի արտգործնախարար Արարատ Միրզոյանը հայտարարել էր Թուրքիայի Անթալիայում կայանալիք համաժողովին մասնակցելու և Չավուշօղլուի հետ հանդիպման մասին։ «Ինչպես անցյալ տարի, ես Թուրքիայի արտգործնախարարից Անթալիայում դիվանագիտական ֆորումի մասնակցելու հրավեր ստացա, և այս տարի, ամենայն հավանականությամբ, կմասնակցեմ դրան։ Ըստ ամենայնի, այնտեղ նույնպես հանդիպում է լինելու»,- ասել է Միրզոյանը՝ անդրադառնալով Չավուշօղլուի հետ հանդիպմանը։