84 տարեկան հասակում մահացել է վրացի հայտնի դերասան, երգիչ, սցենարիստ Վախթանգ Կիկաբիձեն: Այս մասին հայտնում է TASS-ը՝ հղում անելով վրացական լրատվամիջոցներին:
Վախթանգ Կիկաբիձեն ծնվել է 1938 թվականի հուլիսի 19-ին՝ Թբիլիսիում։
Առաջին անգամ 1966 թվականին է հանդես եկել կինոյում՝ ռեժիսոր Նիկոլայ Սանիշվիլիի «Հանդիպում լեռներում» ֆիլմում։ 1966 թվականին Վախթանգ Կիկաբիձեն ընդունվել է «Օրերա» համույթ (հարվածային գործիքներ, վոկալ)։ 1969 թվականին առաջին անգամ նկարահանվել է Գեորգի Դանելիայի «Մի՛ վշտանա» ֆիլմում, որի համար 1970 թվականին Կարտախենայի միջազգային կինոփառատոնին արժանացել է մրցանակի տղամարդու լավագույն դերի համար։ Հաջորդ նշանակալի ֆիլմը 1973 թվականին ռեժիսոր Գեորգի Շենգելայայի «Վերիյսկի թաղամասի մեղեդին» էր։ 1977 թվականին էկրան բարձրացավ Դանելիայի «Միմինո» ֆիլմը, որը 1978 թվականին արժանացավ ԽՍՀՄ պետական մրցանակի։
1981 թվականին Կիկաբիձեն իր սցենարի հիման վրա նկարահանեց 4 մասանոց կատակերգություն՝ «Լա՛վ եղիր, բարեկամս» (Գաբրովո-83 Գրան պրի), իսկ 1985 թվականին՝ «Տղամարդիկ և այլք» ֆիլմը։
1999 թվականին Մոսկվայի «Աստղերի հրապարակ»-ում դրվեց նրա աստղը, իսկ 2006 թվականին Թբիլիսիի ֆիլհարմոնիայի շենքի առջևի հրապարակում՝ նրա «Վրացական աստղը»։ Երկրի վրա բարություն կատարելու համար Ուկրաինայի կողմից արժանացել է Նիկոլայ Հրաշագործի միջազգային շքանշանի, Ռուսաստանի կողմից՝ Կոնստանտին Մեծի շքանշանի, Վրաստանից՝ Պատվո շքանշանի (1994 թ.), Վախթանգ Գորգասալի երրորդ աստիճանի շքանշանի։ 70-ամյա հոբելյանի առթիվ Վրաստանի կողմից արժանացել է Սուրբ Գեորգիի անվան հաղթանակի շքանշանի, Ռուսաստանից՝ Բարեկամության շքանշանի, սակայն վերջինից 2008 թվականի Հարավային Օսիայի օգոստոսյան դեպքերից հետո հրաժարվել է:
Կիկաբիձեն նաև մի շարք հայտնի երգերի կատարող է, ինչպիսիք են «Չիտո գրիտո», «Իմ տարիները իմ հարստությունն են» ստեղծագործությունները: