6.1. Э манушэ́н прэ пхув ячя́ буты́р, тэ бияндёнас лэ́ндэ о чяя́,
6.2. О чявэ́ Дэвлэ́скрэ дыкхнэ́, со чяя́ манушэ́нгрэ сы шука́р, тэ выкэдэ́нас лэн пир о йило́, тэ лэ́нас лэн палоро́м.
6.3. О Дэвэ́л пхэндя́: «Мро пхурдыпэ́н дрэ манушэ́стэ нанэ́ навсегда́; пал дова́ кай ёв сы масэ́ндэр; мэк дживэ́л ёв шэл тэ биш бэрш».
6.4. Дрэ долэ́ дывэса́ барэ́ мурша́ джиндэ́ прэ пхув, тэ чявэ́ Дэвлэ́скрэ явнэ́ ко чяя́ манушэ́нгрэ, тэ сыс лэ́ндэ сарэ́ндэ чяворэ́. Тэ ёнэ́ сыс зоралэ́ тэ славу́тна.
6.5. Нэ Дэвэ́л дыкхья́, со прэ пхув ячя́ бут фуипэ́, тэ мануша́ кэрэ́нас ада́, тэ лэ́нгирэ йилэ́ тэ годя́ гэнэ́ ко на́лачипэ́.
6.6. Лыя́ Дэвлэ́с о дорипэ́ со Ёв кэрдя́ манушэ́с прэ пхув, тэ баро́ киркипэ́ лыя́ Лэ́скиро йило́.
6.7. О Дэвэ́л пхэндя́: «Тэ прила́в мэ манушэ́н пхувья́тыр, сарэ́н со кэрдём, и лэ́нца прила́в э жывотнонэ́н, э сапэ́н, э чириклэ́н. Ма́нгэ сы кирко́ со мэ кэрдём лэн».
6.8. Екх о Но́ё сыс лачё ваш э Дэвлэ́скэ.
6.9. Э́на лэ́скиро джиипэ́. О Но́ё джиндя́ пир о чячипэ́ тэ би грэхо́скиро, тэ джя́лас пир о джиипэ́ Дэвлэ́са.
6.10. Лэ́стэ сыс трин чявэ́: Си́мо, Ха́мо тэ Яфе́то.
6.11. Э пхув хасия́ анги́л Дэвлэ́скиро муй, сари́ пхэрды́ фуипна́са.
6.12. О Дэвэ́л дыкхья́ сыр саро́ со сы джидо́ прэ пхув джял на́лаче дромэ́нца тэ кэрэ́л э пхув джюнгалы́.
6.13. О Дэвэ́л пхэндя́ Ноёскэ: «Саро́ джидо́ со сы, мэ хаськира́ва; э пхув сы джюнгалы́ фуипна́стыр; мэ прила́ва сарэ́н и сари́ пхув».
6.14. «Кэр о ковче́го, баро́ сунду́ко, смолистонэ́ каштэ́ндыр, тэ кэр дрэ лэ́стэ шту́бы, тэ сарэ́ ва́нты макх э смола́са, андрэ́ тэ яври́».
6.15. О Дэвэ́л пхэндя́, саво́ баро́ сунду́ко тэ кэрэ́л – саво́ длэ́нго тэ саво́ учё.
6.16. Тэ сави́ тэ кэрэ́л э фэ́нштра, тэ кай тэ кэрэ́л э по́рта, тэ кицы́ тэ кэрэ́л о па́ты: трин.
6.17. И пхэндя́: «Мэ бичява́ва прэ пхув баро́ паны́, тэ хасёл саро́ со джидо́ тэ пхурдэ́л тэл о болыбэ́; саро́ прэ пхув нашавэ́ла джиипэ́».
6.18. «Нэ ту́са мэ кэра́ва о заве́то, и ту явэ́са дро ковче́го э ромня́са, тэ чявэ́нца, тэ чявэ́нгирэ ромне́нца».
6.19. «Ян дро ковче́го сарэ́ джидэ́н по дуй, кон дживэ́л прэ пхув, лэс тэ ла; тэ яче́нпэ ёнэ́ джидэ́ ту́са».
6.20. «По дуй сарэ́ чириклэ́ндыр, сапэ́ндыр, звере́ндыр, жукэ́ндыр – тэ яче́нпэ джидэ́».
6.21. «Лэ пэ́са хабэ́ саво́ сы, тэ хас ту и тэ хан сарэ́».
7.1. О Но́ё кэрдя́ саро́ со Дэвэ́л пхэндя́.
7.2. О Дэвэ́л пхэндя́ Ноёскэ: «Яв ту, тэ сарэ́ тырэ́ тэ явэ́н дро ковче́го, мэ дыкхьём сыр ту дживэ́с пир о чячипэ́ анги́л ма́ндэ».
7.3. «Тэ лэ кажнонэ́ ското́стыр по эфта́ муршэ́н тэ по эфта́ джювле́н».
7.4. «Тэ чириклэ́н лэ по эфта́ муршэ́н тэ по эфта́ джювле́н, тэ ракхэ́с лэн прэ пхув».
7.5. «Эфта́ дывэса́ проджя́на, тэ мэ ла́ва тэ чива́в прэ пхув брышы́нд штар дэша́ дывэса́, штар дэша́ ратя́, тэ хасёл саро́ со мэ кэрдём, тэ явэ́л э пхувья́киро муй жужо́».
7.6. О Но́ё кэрдя́ саро́ со Дэвэ́л пхэндя́.
7.7. Коли́ баро́ паны́ явья́, Ноёскэ сыс шов шэл бэрш.
7.8. И гэя́ Но́ё ромня́са, тэ чявэ́нца, тэ чявэ́нгирэ ромне́нца криг барэ́ пане́стыр дро ковче́го.
7.9. Сарэ́ ското́стыр, сарэ́ звере́ндыр тэ чириклэ́ндыр, сапэ́ндыр тэ жукэ́ндыр со джиндэ́ прэ пхув,
7.10. по дуй, ёв тэ ёй, явнэ́ дро Ноёскиро ковче́го, сыр о Дэвэ́л пхэндя́.
7.11. Эфта́ дывэса́ прогэнэ́, тэ баро́ паны́ пэя́ прэ пхув.
7.12. Тэ Ноёскэ сыс шэл шов бэрш, екх чён, дэшушо́в дывэса́; дрэ дава́ дывэ́с о болыбэ́ откэрдя́пэ, тэ сарэ́ ґанынгэ́ндыр тхадя́ паны́,
7.13. тэ пэрэ́л о брышы́нд прэ пхув штар дэша́ дывэса́, штар дэша́ ратя́.
7.14. Дрэ дава́ дывэ́с о Но́ё, о Си́мо, о Ха́мо, о Яфе́то тэ лэ́нгирэ ромня́ явнэ́ дро ковче́го.
7.15. Ёнэ́, тэ сарэ́ джидэ́ кон урня́лас тэ кон джя́лас пир э пхув про ґэра́ и би ґэрэ́нгиро,
7.16. дрэ конэ́стэ сыс джиипэ́, по дуй, явнэ́ дро ковче́го,
7.17. ёв тэ ёй, сыр о Дэвэ́л пхэндя́. О Дэвэ́л закэрдя́ э по́рта пал лэ́ндэ.
7.18. Баро́ паны́ сыс штар дэша́ дывэса́, тэ закэрдя́ сари́ пхув, тэ ґаздыя́ ковче́го, тэ ёв джя́лас упра́л.
7.19. Са буты́р и буты́р паны́ явэ́лас, тэ ковче́го сыс пашло́ про паны́.
Дя́кэ бут паны́ явья́ прэ пхув, со уче́ бэ́рги тэл о болыбэ́ хасинэ́ дро паны́.
7.20. Тэ паны́ тэрдо́ сыс упра́л, и бэрги тэла́л.
7.21. О мануша́ и саро́ со дживэ́лас прэ пхув – хасинэ́.
7.22. Сарэ́, дрэ конэ́стэ пхурдэ́лас о джиипэ́ – сарэ́ мэнэ́.
7.23. Хасинэ́ мануша́, зве́ри, сапа́, чириклэ́, хасинэ́ сарэ́, ячья́пэ Но́ё, тэ кон сыс лэ́са дро ковче́го.
7.24. Паны́ сыс тэрдо́ прэ пхув шэл, тэ паш шэл дывэса́.
8.1. О Дэвэ́л рипирдя́ пал о ковче́го, тэ мэкья́ балва́л прэ пхув, тэ паны́ лыя́ тэ джял тэлэ́.
8.2. О ґанынга́ закэрдэ́пэ, о болыбэ́ закэрдя́пэ, о брышы́нд пириячья́.
8.3. О паны́ джя́лас пхувья́тыр пал шэл, тэ паш шэл дывэса́.
8.4. О ковче́го тэрдыя́ про бэ́рги кай Арара́то.
8.5. О паны́ са джя́лас тэлэ́, тэ ячнэ́ на́бут дыкхнэ́ о бэ́рги упрэ́.
8.6. Штар дэша́ дывэса́ прогэнэ́, тэ Но́ё откэрдя́ э фэ́нштра.
8.7. Ёв мэкья́ калэ́ корако́с, тэ кора́ко урня́лас одори́г, адари́г, жыка́й пхув на шутия́.
8.8. Тэ́нчи мэкья́ э голумбо́с тэ дыкхэ́л, гэя́ ли паны́ пхувья́тыр.
8.9. О голу́мбо на латья́ кай тэ бэшэ́л, и рисия́ ко ковче́го, и Но́ё дыя́ лэ́скэ о васт тэ бэшэ́л.
8.10. Ёв дужакирдя́ вави́р эфта́ дывэса́ тэ мэкья́ голумбо́с палэ́.
8.11. О голу́мбо рисия́ бевеле́, тэ рикирэ́лас э джиды́ патри́н э рукхэ́стыр, тэ Но́ё ґалыя́ со паны́ угэя́.
(перевод Л. Мазикина, редакция В.Солдатенко)