Լաչինի միջացքի ապօրինի շրջափակման ուղղությամբ ավելի առարկայական քայլեր ենք ակնկալում միջազգային հանրությունից, այդ թվում ՄԱԿ-ի ԱԽ մշտական անդամ Ռուսաստանի Դաշնությունից, ում խաղաղապահ զորախումբը տեղակայված է ԼՂ-ում։ Այս մասին կառավարության հունվարի 5-ի նիստի ժամանակ ասաց ՀՀ վարչապետ Նիկոլ Փաշինյանը։
Նա նշեց, որ Լաչինի միջանցքը սեփական վերահսկողության տակ պահելը ՌԴ ուղիղ պարտավորությունն է, իսկ Ադրբեջանի կողմից այն շարունակում է փակ մնալ արդեն 25 օր։
«Չնայած միջազգային լայն արձագանքին՝ Ադրբեջանը քայլեր չի ձեռնարկում միջանցքը բացելու ուղղությամբ։ Միջանցքը փակելով Ադրբեջանը կոպտորեն խախտում է նոյեմբերի 9-ի եռակողմ հայտարարությամբ իր ստանձնած ուղղակի պարտավորությունը, ինչը լրջագույն հարցեր է առաջացնում պաշտոնական Բաքվի պայմանագրաունակության վերաբերյալ»,- նշեց Փաշինյանն ու հավելեց, որ փոխարենը Ադրբեջանը փորձում է Հայաստանին վերագրել սեփական պարտավորությունը չկատարելու գործելակերպ, ինչը բացարձակապես մտացածին է։
«Լաչինի միջանցքի փակման վերաբերյալ տարբեր պատճառաբանություններ են բերվում, բայց իմ համոզմամբ ամենախորը պատճառն այն է, որ ԼՂ հայերը շարունակում են ապրել իրենց հայրենիքում։ Եվ միջազգային հանրությունն ավելի ու ավելի հստակ է արձանագրում ԼՂ հայերի էթնիկ զտման, ցեղասպանության ենթարկելու Ադրբեջանի տեսանելի քաղաքականությունը»,- նկատեց վարչապետը։
Նա հիշեցրեց, որ իր որոշմամբ դեկտեմբերի 30-ից ԼՂ ժողովրդին աջակցելու նպատակով աշխատանքային խումբ է ստեղծվել՝ փոխվարչապետ Տիգրան Խաչատրյանի ղեկավարությամբ։ Նա արդեն մի քանի նիստ է արել ու կայացնում է իրավիճակից բխող հումանիտար բնույթի որոշումներ և գործունեությունը կշարունակի որքան անհրաժեշտ է։
Նիկոլ Փաշինյանը, հաշվի առնելով տարածաշրջանային իրավիճակը, վերահաստատեց 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի, 2022 թվականի հոկտեմբերի 31-ի եռակողմ հայտարարության դրույթներին, ինչպես նաև 2022 թվականի հոկտեմբերի 6-ի Պրահայի քառակողմ հայտարարություններին իր հավատարմությունը։
Ըստ վարչապետի՝ Լաչինի միջանցքի փակումն առավել անհրաժեշտ է դարձնում այնտեղ միջազգային փաստահավաք խումբ գործուղելու անհրաժեշտությունը։
Հիշեցնենք, որ դեկտեմբերի 12-ին մի խումբ ադրբեջանցիներ` «բնապահպանական» պատճառաբանություններով ժամը 10:30-ից փակել են Ստեփանակերտ-Գորիս մայրուղու Շուշի-Քարին տակ հատվածը՝ ոտնահարելով քաղաքացիական բնակչության կենսական շահերն ու իրավունքները:
Այսօրվա դրությամբ ճանապարհը շարունակում է փակ մնալ: Արցախի ԱԽ նիստում որոշում է կայացվել դիմել ՌԴ Արցախի Հանրապետությունում տեղակայված ՌԴ խաղաղապահ զորակազմի հրամանատարությանը՝ անընդունելի համարելով միջանցքի փակումը, որը բերելու է Արցախում հումանիտար աղետի: