2022 թվականին Հայաստանի հետ խաղաղության պայմանագրի և սահմանի սահմանազատման շուրջ բանակցություններում ձեռք բերված առաջընթացը շատ սահմանափակ է: Ինչպես հայտնում են ադրբեջանական լրատվամիջոցները, այս մասին հայտարարել Է Ադրբեջանի ԱԳ նախարար Ջեյհուն Բայրամովը:
Նա իր այս դիրքորոշումը կապել է հայկական կողմի, իր բնորոշմամբ, «ապակառուցողական և անհետևողական» դիրքորոշման հետ:
Բայրամովը հիշեցրել է, որ խաղաղության պայմանագրի շուրջ Հայաստանի և Ադրբեջանի ԱԳՆ ղեկավարների միջև բանակցությունների առաջին փուլը տեղի է ունեցել Ժնևում, երկրորդը՝ Վաշինգտոնում: Բանակցությունների երրորդ փուլը, որը նախատեսված էր Մոսկվայում, նրա խոսքով, չի կայացել հայկական կողմի մերժման պատճառով։
Հիշեցնենք, որ Մոսկվայում դեկտեմբերի 23-ին նախատեսված էր Հայաստանի, Ռուսաստանի և Ադրբեջանի արտգործնախարարների եռակողմ հանդիպումը։ Սակայն Բերձորի միջանցքում ստեղծված իրավիճակի պատճառով հայկական կողմը դեկտեմբերի 22-ին խնդրել էր հետաձգել հանդիպումը:
Հիշեցնենք, որ դեկտեմբերի 12-ի առավոտյան ժամը 10:30-ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Արցախի ԱԽ նիստում որոշում է կայացվել նամակով դիմել ՌԴ խաղաղապահ զորակազմի հրամանատարությանը: Գորիս-Ստեփանակերտ ճանապարհի հարցով կայացել է նաև ՀՀ ԱԽ նիստ։ Հայաստանը հայտարարել է ԼՂ հայերի իրավունքների ապահովման միջազգային մեխանիզմների գործարկման անհրաժեշտությունը։
Ռուբեն Վարդանյանն գլխավորությամբ ստեղծվել է օպերատիվ շտաբ, որը գործելու է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով: Ադրբեջանական կողմը դեկտեմբերի 13-ին փակել է Արցախի գազամատակարարումը։