Ինչ հարցեր էլ ծագեն երկրի վրա, ես համոզված եմ, որ անհրաժեշտ է կանոնավոր հանդիպումներ ունենալ, պայմանավորվել, ամրապնդել վստահությունը և հիմք ստեղծել բոլոր հարցերի լուծման համար, ասել է ՌԴ ԱԳ նախարար Սերգեյ Լավրովն իր ադրբեջանցի գործընկեր Ջեյհուն Բայրամովի հետ հանդիպմանը՝ մեկնաբանելով, թե ինչու է Հայաստանը հրաժարվել հանդիպումից։
«Նախատեսվում էր մեր տարածքում անցկացնել Հայաստանի և Ադրբեջանի արտգործնախարարների հանդիպումը՝ շարունակելու խաղաղության պայմանագրի քննարկումը։ Մենք պատրաստվում էինք այս միջոցառմանը, բայց, ցավոք, վերջին պահին մեր հայ գործընկերները հրաժարվեցին գալ Մոսկվա՝ դա բացատրելով տեղում տիրող իրավիճակով»,- ասել է նա։
Նա ափսոսանք է հայտնել, որ նման հնարավորությունը բաց է թողնվել և ընդգծել, որ «այնուամենայնիվ, այսօր կքննարկվեն այն խնդիրները, որոնց առջև կանգնած են երկրները՝ նախագահների և Հայաստանի վարչապետի որոշումներին համապատասխան»։ Լավրովի խոսքով՝ չորս եռակողմ հայտարարություններ հավանության են արժանացել, և «դրանց վրա աշխատանքներն ընթանում են, բայց, իհարկե, մենք կցանկանայինք արագացնել դա»։
Հայաստանի արտգործնախարարության մամուլի քարտուղար Վահան Հունանյանը Armenia Today-ին հայտնել էր, որ հայկական կողմը խնդրել է հետաձգել Հայաստանի, Ռուսաստանի և Ադրբեջանի ԱԳ նախարարների հանդիպումը՝ Լաչինի միջանցքում ստեղծված իրավիճակով պայմանավորված։
Հիշեցնենք, որ դեկտեմբերի 12-ին մի խումբ ադրբեջանցիներ` «բնապահպանական» պատճառաբանություններով ժամը 10:30-ից փակել են Ստեփանակերտ-Գորիս մայրուղու Շուշի-Քարին տակ հատվածը՝ ոտնահարելով քաղաքացիական բնակչության կենսական շահերն ու իրավունքները:
Այսօրվա դրությամբ ճանապարհը շարունակում է փակ մնալ: Արցախի ԱԽ նիստում որոշում է կայացվել դիմել ՌԴ Արցախի Հանրապետությունում տեղակայված ՌԴ խաղաղապահ զորակազմի հրամանատարությանը՝ անընդունելի համարելով միջանցքի փակումը, որը բերելու է Արցախում հումանիտար աղետի: