Մարտակերտ-Քարվաճառ ավտոճանապարհն ադրբեջանցիների համար փակ է և այնքան է փակ մնալու մինչև ադրբեջանցիները չբացեն Գորիս-Ստեփանակերտ ավտոճանապարհը։ Այս մասին «Արցախի» հանրային հ/ը-ի հետ զրույցում նշել է Մարտակերտի շրջվարչակազմի ղեկավար Արսեն Ավանեսյանը։
«Այդ ճանապարն ադրբեջանցիների համար փակ է դեկտեմբերի 12-ից», - նշել է նա։
Արցախի շրջվարչակազմերի ղեկավարների խոսքով գոյատևումը շրջաններում նորմալ է։ Նրանք նշել են, որ պարենի պակաս ևս չկա, բայց պահեստներում պաշարները նվազում են։
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Ադրբեջանական կողմը դեկտեմբերի 13-ին նաև փակել է Արցախի գազամատակարարումը։
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործելու է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
Նշենք նաև, որ Կառավարության նիստում վարչապետ Նիկոլ Փաշինյանը հայտարարել է, որ Ադրբեջանը շարունակաբար իրագործում է «Լեռնային Ղարաբաղն առանց հայերի» քաղաքականություն և հայկական կողմն ամեն ինչ պետք է անենք, որ այս քաղաքականությունը պատշաճ միջազգային գնահատականի արժանանա:
Դեկտեմբերի 16-ի վաղ առավոտյան Արցախի պետնախարարը հայտնեց, որ վերականգնվել է Արցախի գազամատակարարումը: