Անհանգիստ մարդիկ իրենց քաղաքական ու հասարակական կապերով փորձում են մեզ վարկաբեկել: Այս մասին այսօր Facebook-յան ուղիղ եթերի ժամանակ ասաց Արցախի պետնախարար Ռուբեն Վարդանյանը:
«Ես շատ մարդկանց եմ «կպել», ու այնքան ֆեյք ու կեղտ են լցնում: Ինչպես ռուսներն են ասում, պարզվում է, «медовый месяц закончился»: Այսինքն՝ հասկանում են, թե ինչ ենք փոխում, ինչպես ու դրանից առաջացած դժգոհությունները տարբեր ձևերով օգտագործելով՝ փորձում են ամեն կերպ մեզ վարկաբեկել, բայց մենք չենք վախենում, հանգիստ շարունակում ենք մեր գործը»,- ասաց Վարդանյանը:
Անդրադառնալով Արցախում ստեղծված իրավիճակին՝ նա նշեց, որ Արցախը Հայաստանին կապող մայրուղին բաց չէ, թեպետ այդ առումով տարատեսակ տեղեկություններ են շրջանառվում: Նա ընդգծեց, որ ադրբեջանցիները շարունակում են խանգարել՝ չթողնելով, որ մեքենաներն անցնեն ճանապարհով:
«Իրենք ամբողջությամբ պետք է դուրս գան»,- հավելեց նա:
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Ադրբեջանական կողմը դեկտեմբերի 13-ին նաև փակել է Արցախի գազամատակարարումը։
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործելու է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
Նշենք նաև, որ Կառավարության նիստում վարչապետ Նիկոլ Փաշինյանը հայտարարել է, որ Ադրբեջանը շարունակաբար իրագործում է «Լեռնային Ղարաբաղն առանց հայերի» քաղաքականություն և հայկական կողմն ամեն ինչ պետք է անենք, որ այս քաղաքականությունը պատշաճ միջազգային գնահատականի արժանանա:
Դեկտեմբերի 16-ի վաղ առավոտյան Արցախի պետնախարարը հայտնեց, որ վերականգնվել է Արցախի գազամատակարարումը: