Մի խումբ քաղաքացիներ այսօր հերթական բողոքի ակցիան են իրականացրել ՀՀ-ում ՄԱԿ-ի գրասենյակի մոտ։
«Եկել ենք մեր աջակցությունը հայտնենք արցախցի մայրիկներին, երկրորդը՝ նամակը փոխանցենք ՄԱԿ-ի գրասենյակին, և երրորդը կոչ հղենք այն մարդկանց, ովքեր Երևանում են և իրենց զերծ են պահում այս ամենից, պետք է իմանան, թե ինչ վիճակում են մեր 120 հազար համերկրացիները»,-նշել են նորածինների մայրերը։
Մայրիկներից մեկը նշեց, որ տեղյակ լինելով, որ ամբողջ Ստեփանակերտում և Արցախի դեղատներում վերջացել է կաթնային խառնուրդով կերը, իրենք՝ սրտացավ մայրիկներով որոշել են իրենց պարզ ակցիան անել՝ նամակ տալ ՄԱԿ-ի գրասենյակին։
«Ընդամենը՝ մեկ խնդրանք ունենք՝ հիշե՛ք Արցախում կա շատ խոցելի խումբ՝ մինչև մեկ տարեկան նորածինները, որոնք սնվում են կաթնախառնուրդով։ Եթե դա վերջանա, ապա նրանք սնվելու այլ բան չունեն, և շատ լուրջ առողջական ռիսկեր են առաջանում, եթե այս իրավիճակն ավելի երկարի։ Ներկայացված է այս հարցը, որ այս խնդիրը կա։ ՄԱԿ-ը հումանիզմի միակ աղավնին է՝ որպես հումանիստական կառույց արեք ձեր անելիքը»,- նշեց կանանցից մեկը։
Armenia Today-ը կապ հաստատեց Արցախի առողջապահության նախարարության մամուլի խոսնակ Անգելինա Իսախանյանի հետ։ Վերջինս նշեց, որ Արցախում այս պահին սուր դեղորայքային պակաս չկա որևէ հաստատությունում, սակայն կա մտահոգություն մատակարարման դադարեցման ուղղությամբ։
Armenia Today-ը նաև կապ հաստատեց նաև Արցախի աշխատանքի և միգրացիայի հարցերի նախարարության մամուլի ծառայության հետ, որտեղից ասացին, որ մանկական կերերի առումով օգնության տրամադրում չունեն, սակայն նախկինում սոցիալապես անապահով ընտանիքներին տրամադրել են մանկական տակդիրներ, այժմ նույնպես տակդիրների տրամադրումը պահպանվում է։
Հիշեցնենք, որ դեկտեմբերի 12-ին մի խումբ ադրբեջանցիներ` «բնապահպանական» պատճառաբանություններով ժամը 10:30-ից փակել են Ստեփանակերտ-Գորիս մայրուղու Շուշի-Քարին տակ հատվածը՝ ոտնահարելով քաղաքացիական բնակչության կենսական շահերն ու իրավունքները: Այսօրվա դրությամբ ճանապարհը շարունակում է փակ մնալ: Արցախի ԱԽ նիստում որոշում է կայացվել դիմել ՌԴ Արցախի Հանրապետությունում տեղակայված ՌԴ խաղաղապահ զորակազմի հրամանատարությանը՝ անընդունելի համարելով միջանցքի փակումը, որը բերելու է Արցախում հումանիտար աղետի: