Ադրբեջանը բողոքի նոտա է հայտնել UNICEF-ի երևանյան գրասենյակի ղեկավարի արտահայտությունների կապակցությամբ։
UNICEF-ի ադրբեջանական գրասենյակի ղեկավարը հրավիրվել է Ադրբեջանի նախագահի աշխատակազմի արտաքին քաղաքական կապերի բաժին։
Ինչպես հաղորդում են տեղական լրատվամիջոցները, հանդիպմանը UNICEF-ի ներկայացուցիչներին մտահոգություն է հայտնվել այդ կառույցի երևանյան գրասենյակի ղեկավարի կողմից Լաչինի միջանցքում ստեղծված իրավիճակի վերաբերյալ արտահայտած մտահոգության կապակցությամբ։
Ընդգծվել է, որ «ՅՈՒՆԻՍԵՖ-ի երևանյան գրասենյակի ղեկավարը գերազանցել է իր մանդատը և լիազորությունների շրջանակը»։
Հիշեցնենք, որ UNICEF-ի երևանյան գրասենյակը հանդես էր եկել հայտարարությամբ, որում նշել էր, որ «Լաչինի միջանցքի փակումն ազդում է երեխաների վրա՝ սահմանափակելով նրանց գոյատևման, առողջ աճի և բարեկեցության համար անհրաժեշտ հիմնական ծառայությունների հասանելիությունը»:
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործում է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
ՄԱԿ-ի Անվտանգության խորհուրդը քննարկել է իրավիճակը Լաչինի միջանցքում։ Նիստի ընթացքում ԱՄՆ-ի, Ռուսաստանի, Ֆրանսիայի և Մեծ Բրիտանիայի ներկայացուցիչները հայտարարել են միջանցքով երթևեկությունը վերականգնելու անհրաժեշտության մասին:
Դեկտեմբերի 25-ին Արցախում՝ Ստեփանակերտի Վերածննդի հրապարակում, բազմահազարանոց համաժողովրդական հանրահավաք տեղի ունեցավ:
Արցախի կառավարությունը հայտարարել է, որ ժամանակավորապես դադարեցնում է հանքի շահագործումը. որոշում է կայացվել դիմել միջազգային կազմակերպություններին՝ «Բեյզ Մեթըլս» ընկերության գործունեության հետ կապված միջազգային էկոլոգիական փորձաքննություն իրականացնելու համար: