Երևանում ապաստարանների վիճակը զգալիորեն բարելավվել է։ Այս մասին տարեմուտին կայացած մամուլի ասուլիսի ժամանակ ասաց Երևանի փոխքաղաքապետ Տիգրան Ավինյանը։
Նրա խոսքով՝ անվտանգության ոլորտի խնդիրները դեռ երկար ժամանակ են լինելու, իսկ դա նշանակում է, որ պետք է ավելի շատ աշխատել,պատրաստ լինել ցանկացած սցենարի։ Քանի որ անգամ պատերազմի և անվտանգության ոլորտի խնդիրների առկայության պայմաններում կյանքը պետք է շարունակվի։
Ավինյանի խոսքով՝ այս մեկ տարում իրականացվել է ապաստարանների մաքրման մեծածավալ աշխատանք, սակայն խնդիրը լիովին լուծված չէ։
Շարունակելով Երևանում իրականացրած բարեկարգման աշխատանքների թեման՝ Ավինյանը տեղեկացրեց, որ վերանորոգվում է երկու պոլիկլինիկա և 22 մանկապարտեզ։ Նրա խոսքով, տարվա ընթացքում ևս երկու մանկապարտեզներում ավարտվել են վերանորոգման աշխատանքները, իսկ մեկ մանկապարտեզ շինարարական մրցույթի փուլում է։
Փոխվարչապետի խոսքով՝ մանկապարտեզներում և պոլիկլինիկաներում վերանորոգման և շինարարական աշխատանքներն իրականացվում են երկու տարբեր ծրագրերով։
«Ծրագրերի հաջող ընթացքը մեզ նաև թույլ տվեց մեր գործընկեր կազմակերպությունների հետ սկսել ծրագրի հաջորդ փուլի աշխատանքները, որոնք նախատեսում են 34 մանկապարտեզների և վեց պոլիկլինիկայի հիմնանորոգում և վերանորոգում, ևս 35 մանկապարտեզներ, որտեղ հիմնանորոգված են»,- ընդգծեց փոխքաղաքապետը։
Ավինյանը ներկայացրեց նաև ճանապարհների և ստորգետնյա անցումների վերանորոգման աշխատանքները։ «Լամբադա հանգույցի ստորգետնյա անցման հիմնանորոգումն արդեն ավարտվել է։ Փակ շուկայի տարածքում գետնանցումի վերանորոգման աշխատանքները շարունակվում են, 2023 թվականին նախատեսվում է սկսել Մաշտոց-Լուսավորիչ-Պարոնյան փողոցների խաչմերուկի գետնանցումի վերանորոգումը»,- ասաց փոխքաղաքապետը։
Նա հայտնեց, որ այս եռամսյակում շահագործման է հանձնվել Խաչատուրյան-Մամիկոնյանց փողոցները միացնող հատվածը, որը էական ազդեցություն ունի Կոմիտասի պողոտայի երթեւեկությունը հեշտացնելու վրա։
Ավինյանի խոսքով, Երևանի ճանապարհների վերանորոգման նպատակով առաջին անգամ մշակվել է համալիր նախագիծ, որն ընդգրկում է 12 վարչական շրջան և մոտ 200 կմ ճանապարհ։
Ավինյանը տեղեկացրեց նաև, որ 2023 թվականին նախատեսվում է սկսել դեպի մանկական երկաթուղի տանող երկու թունելների հիմնանորոգումը։ Բարեկարգման աշխատանքներ են իրականացվում Երևանի այգիներում։
Մանրամասները՝ տեսանյութերում։