Ռուսաստանը մտահոգված է երկու ուղղություններով քաղաքացիների, տրանսպորտային միջոցների և բեռների համար Լաչինի միջանցքի լիարժեք գործունեության վերականգնման գործում առաջընթացի բացակայությամբ, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան: «Ռուսական կողմը, մասնավորապես՝ ռուսական խաղաղապահ զորախմբի ղեկավարությունը, շարունակում է հետևողական քայլեր ձեռնարկել այս իրավիճակի կարգավորման համար», - ընդգծել է նա:
Զախարովան նշել է, որ ռուս խաղաղապահների դեմ ցանկացած հարձակում և սադրանք վնասում է Հայաստանի և Ադրբեջանի միջև կարգավորմանը, և կոչ է արել Բաքվին և Երևանին խստորեն պահպանել Ռուսաստանի, Ադրբեջանի և Հայաստանի առաջնորդների 2020 թվականի նոյեմբերի 9-ի հայտարարության բոլոր դրույթները:
«Հանդես ենք գալիս տարածաշրջանում տրանսպորտային և տնտեսական կապերի ապաշրջափակման, հայ-ադրբեջանական սահմանի սահմանազատման, Բաքվի և Երևանի միջև խաղաղության պայմանագրի նախապատրաստման և երկու երկրների հասարակական գործիչների, փորձագետների և խորհրդարանականների միջև շփումների հաստատման օգտին», - ասված է ՌԴ ԱԳՆ պաշտոնական ներկայացուցչի մեկնաբանության մեջ:
Զախարովան դեկտեմբերի 29-ին կայացած ճեպազրույցում նաև անտեղի է անվանել Լեռնային Ղարաբաղում ռուս խաղաղապահների հասցեին հնչող քննադատությունը: «Մենք բազմիցս ասել ենք, որ ռուս խաղաղապահներն անում են հնարավոր ամեն ինչ իրավիճակի կարգավորման համար։ Ոչ մի հրապարակային հարձակում գործին չի օգնում։ Իրավիճակն ավելի վատ էր։ Աշխատում ենք, որպեսզի իրավիճակը բարելավվի», - նշեց նա։