Ադրբեջանի կառավարությունը Բրիտանական Anglo Asian Mining Company ընկերությանը է փոխանցել Արցախի Մարտակերտի շրջանում գտնվող Կաշենի հանքավայրի կառավարումը, հաղորդում է CivilNet-ը: Պարբերականի տվյալներով՝ ընկերության բաժնետերերից մեկը ԱՄՆ նախկին նախագահ Ջորջ Բուշ ավագի վարչակազմի ղեկավարն է։
Պարբերականի տվյալներով՝ հանքի կառավարումը փոխանցվել է հուլիսին՝ 3 մլրդ դոլարի գործարքի շրջանակներում: Նշվում է, որ Կաշենի պղնձամոլիբդենային հանքը ներկայումս գտնվում է Արցախում տեղակայված Base Metals ընկերության կառավարման ներքո:
Պաշտոնապես գրանցված Մեծ Բրիտանիայում՝ Anglo Asian Mining Company-ն իր կայքում հայտնել է, որ 2022 թվականի հուլիսի 5-ի կոնցեսիոն պայմանագիրը ներառում է երեք հանքավայր՝ 340 քառակուսի մղոն ընդհանուր մակերեսով: Հանքերից մեկը, որ Ադրբեջանը փոխանցել է ընկերությանը, Արցախի Մարտակերտի շրջանի Կաշենի պղնձամոլիբդենային հանքն է։
Պարբերականը նշում է, որ ընկերությունն իր հաղորդագրության մեջ օգտագործել է Կաշենի ադրբեջանական անվանումը և հայտնել, որ 2016 թվականի հունվարի դրությամբ հանքավայրի պաշարները կազմել են 275 000 տոննա պղինձ և 3200 տոննա մոլիբդեն: Նշվում է, որ ընկերությունը թվեր է օգտագործել Base Metals-ի կողմից ավելի վաղ հրապարակված տվյալներից։
Բրիտանական ընկերությունը նաև նշել է, որ ռուս խաղաղապահները տարածաշրջանում են խաղաղության և կայունության ապահովման համար, և Ադրբեջանի կառավարությունը «բոլոր ողջամիտ ջանքերը կգործադրի», որպեսզի ընկերությանը թույլ տա ֆիզիկական հասանելիություն ստանալ հանքավայր:
Պարբերականի տվյալներով՝ ծնունդով Իրանից Ռեզա Վազիրին (Reza Vaziri) բաժնետոմսերի 28% - ով Anglo Asian Mining-ի խոշորագույն բաժնետերն է։ Վազիրին Ադրբեջանում բիզնես է վարում երկրի անկախացումից ի վեր, իսկ մինչ այդ նա Իրանի պետական պաշտոնյա է եղել։ Նշվում է, որ Վազիրին լավ հայտնի է Ադրբեջանում իշխող Ալիևների ընտանիքի հետ իր սերտ կապերով, որոնք նրան տրամադրել են երկրում գործող մետաղական հանքերի մի մասը:
2016 թվականին Վազիրին գրավել է կոռուպցիայի և կազմակերպված հանցավորության հետազոտության կենտրոնի (Organized Crime and Corruption Reporting Project, OCCRP) ուշադրությունը, որը հայտնել է, որ փորձել է ձեռք բերել Ադրբեջանի Չովդար ոսկու հանքը, սակայն ձախողվել է, քանի որ Londex Resources S. A. ընկերությունը, որը պատկանում է Ադրբեջանի նախագահ Իլհամ Ալիևի զավակներին և գրանցված է Պանամայում, պայքարի մեջ է մտել հանքի շահագործման լիցենզիայի համար: Նաև Huffington Post-ի հետաքննության մեջ Վազիրին հիշատակվում էր որպես «մեծ ռեսուրսներ ունեցող մարդ, որը ցանկացած պահի կարող էր մուտք ունենալ Ադրբեջանի վարչապետին և նավթի նախարարին»:
Ինչպես գրում է պարբերականը, Anglo Asian Mining-ի մյուս բաժնետերը Ջոն Սունունուն է (պատկանում է ընկերության բաժնետոմսերի 9.3% - ին), ԱՄՆ նախագահ Ջորջ Բուշ ավագի աշխատակազմի նախկին ղեկավարը և զբաղեցրել է Նյու Հեմփշիրի նահանգապետի պաշտոնը: Նշվում է, որ Սունունու ընտանիքի մյուս անդամները նույնպես մասնակցում են ընկերության կառավարմանը։ Բաժնետոմսերի ևս 3,5 տոկոսը պատկանում է Limelight Industrial Developments ընկերությանը, որի մասին մատչելի հանրային տեղեկատվություն չկա, գրում է պարբերականը:
Ավելի վաղ Արցախի Հանրապետության արտաքին գործերի նախարարի պաշտոնակատար Դավիթ Բաբայանը Armenia Today - ի թղթակցին հայտնել էր, որ դեկտեմբերի 12-ին Ստեփանակերտ-Գորիս ճանապարհը փակած Ադրբեջանի գործողությունները նպատակ ունեն կաթվածահար անել Կաշենի հանքի շահագործումը և հարված հասցնել Արցախի տնտեսությանը: