Ադրբեջանցիների կողմից Լեռնային Ղարաբաղը Հայաստանին կապող միակ ճանապարհի արգելափակումը Բաքվի կողմից տարածաշրջանում ռուս խաղաղապահների առաքելությունը խափանելու փորձ է: Այս մասին Telegram-ի իր ալիքում հայտարարել է Պետդումայի պատգամավոր Կոնստանտին Զատուլինը:
«Բաքվում, հավանաբար, կարծում են, որ Ռուսաստանի և Արևմուտքի դիմակայությունն Ուկրաինայում բարենպաստ պահ է Անդրկովկասում ՌԴ ազդեցության թուլացման համար։ Արդյոք շատ վա՞ղ չէ նման կարծիք ունենալ»,-ասել է Զատուլինը:
Նա ընդգծել է, որ բնապահպանության մասին հոգ տանելու կեղծ պատրվակով Ադրբեջանը խախտում է 2020 թվականի նոյեմբերի 9-ի եռակողմ պայմանավորվածությունները:
«Ադրբեջանական նոր սադրանքը հայերին հայրենի հողից դուրս մղելու ռազմավարության մի մասն է, որը կարող է Լեռնային Ղարաբաղում հումանիտար աղետ առաջացնել»-շեշտել է պատգամավորը՝ Լաչինի միջանցքի արգելափակումը որակելով որպես «շրջափակում»: Պատգամավորը Բաքվից պահանջել է դադարեցնել այն:
Նա հույս է հայտնել, որ Ռուսաստանի ղեկավարությունը, դիվանագետներն ու զինվորականները համոզիչ փաստարկներ կգտնեն իրավիճակը նորմալ հուն վերադարձնելու համար:
«Ձգձգման հետագա հնարավոր հետևանքների պատասխանատվությունն ամբողջությամբ ադրբեջանական կողմի վրա է»,-եզրափակել է պատգամավորը:
Հիշեցնենք, որ դեկտեմբերի 12-ի առավոտյան ժամը 10:30-ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Արցախի ԱԽ նիստում որոշում է կայացվել նամակով դիմել ՌԴ խաղաղապահ զորակազմի հրամանատարությանը: Գորիս-Ստեփանակերտ ճանապարհի հարցով կայացել է նաև ՀՀ ԱԽ նիստ։ Հայաստանը հայտարարել է ԼՂ հայերի իրավունքների ապահովման միջազգային մեխանիզմների գործարկման անհրաժեշտությունը։
Ռուբեն Վարդանյանն գլխավորությամբ ստեղծվել է օպերատիվ շտաբ, որը գործելու է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով: Ադրբեջանական կողմը դեկտեմբերի 13-ին փակել է Արցախի գազամատակարարումը։