Пирвайхи юрату - пурнӑҫри пĕрремĕш ҫуркунне : чи ӑшши , ҫепӗҫҫи , ачашши, ӗмӗрлӗхе тӑсӑлакан техӗмлӗ ҫӗмӗрт- сирень шӑршӑлли , хӑлхара яланлӑхах юлнă юратӑва мухтаса юрлакан шӑпчӑк юррилли , пирӗншӗн кӑна карӑннӑ кӑн- кӑвак тӳпепе сап- сар хӗвелли , эпир утнӑ сип- симӗс курӑкли , пирӗн ӑшӑ каҫсемпе ҫап- ҫутӑ, ҫывӑхрах курăнакан , савнине пуҫтарса пама шантарнӑ ҫӑлтӑрсемли , пире ялан сӑнакан , ырӑ- ырӑ ҫутине сапалакан ҫут уйӑхли , ӑшӑ ҫумӑрлӑ ,телейпе тулнӑ , манӑҫми ҫуркунне.
Эс юратакан хӗрача та - тӗнчере чи хитри , ҫепӗҫҫи те ырри . Куҫа курӑнман ҫулӑмпа вӑл ҫунать , ҫав хӗрӳлӗх сана та вутлантарать , илемлетет , чунпа чӗрене яриех уҫса халиччен нихӑҫан та каламан юратун сӑмаххисене калаттарать , чунпа кӗлеткесене ҫывхартать , юратакан чӗресен кӗвӗллӗ таппипе икӗ ҫыншӑн кӑна пиҫекен телей ҫырлине тутантарать .
Асамлă юрату тӗнчи - унтан хитри пулма пултараймасть : ӗмӗт- шухӑшӑн ҫӑтмахӗ , ҫамрӑклӑхӑн шап- шурӑ урхамахӗ, чуна витен купăс сасси , яш- кӗрӗмӗн юрри- ташши , савни кулни те куҫ хӗсни - чӗре савӑнӑҫпа тулни .
Тавтапуçах ҫав ыр хӗре - чӑваш хӗрне , Айкӑш акӑшне , тӳпе парнине , ҫӑлтӑр куҫлине , хӗвел питлине . Сан пеккине эп урӑх тӗл пулмарӑм . Эсӗ - халӗ те маншӑн чи хитри те чи ырӑ чунли , ҫак ҫӗр ҫинче - чи юратнӑ ҫын .
Турӑ та тӳпе хӗрхенччӗрех сана , ҫӑлтӑрӗ-хӗвелӗ саншӑн телейне ытлӑ- ҫитлӗ сапчӗр , ҫут уйӑх кунран- кунах ӗмӗтӳ патне илсе пытӑр сана , манӑн ытарайми пирвайхи юратӑвӑм .
Шел пулин те , пирӗн юрату ӗмӗт тĕнчинчен тухаймарӗ. Хаяр пурнӑҫ унăн алăкне тимĕр сӑнчӑрпа питӗрсе хучӗ. Вӑй ҫитереймерӗмӗр эпир ӑна уҫма - тем пек тӑрӑшсан та , чун- чӗресене тем пек ыраттарсан та . Каҫар ӗнтӗ эс мана , хаклӑ ҫыннӑм . Халь пӗлетӗп телей хакне те ятне . Шел , вӑхӑт урапи каялла ҫаврӑнмасть , пурнӑҫ иккӗ килмест . Пирвайхи юратӑвӑн ҫут сӑнарӗ кӑна , пурнӑҫӑн темӗнле те килекен саманчӗсенче те , ыррӑн та ӑшшӑн , ман чуна ҫутатать . Асаилӳсен сӑваплӑ вучӗ , вӑрҫӑра вилнĕ салтаксене асăнса чӗртнӗ яланах ҫунакан ҫулӑм пек , нихӑҫан та вилмен юрату тӗнчере пуррине ҫирӗплетсе , ман чӗрере кунран кун сӳнмесӗр ҫунать . Ун ҫутинче эпир халӗ те ҫап- ҫамрӑк та хитре, хавас та савӑнӑҫлӑ , пирӗн юрату та телейлӗ...