Սպիտակի աղետալի երկրաշարժից անցել է 34 տարի: 1988 թվականի դեկտեմբերի 7-ին Հայաստանի հյուսիսարևմտյան հատվածում տեղական ժամանակով ժամը 11:41-ին 6,8-7,2 մագնիտուդ ուժգնությամբ երկրաշարժը մակրոսեյսմիկ ինտենսիվությամբ գնահատվեց «արտասովոր կործանարար»։ Սպիտակում ցնցումների ուժգնությունը հասել է մինչև 9-10 բալի:
Միայն Գյումրիում երկրաշարժին զոհ է գնացել 17 000 մարդ, Սպիտակում՝ 4 000, Վանաձորում՝ 1 200, Ախուրյանում ու Ստեփանավանում՝ 625:
Փլատակներից հանվել է ողջ մնացած 45 000 մարդ, տարահանվել է 120 հազարը: Երրաշարժի հետևանքով ավերվել է 11 քաղաք և 58 գյուղ, 21 քաղաք և 342 գյուղ տուժել է: Միևնույն ժամանակ այս բնակավայրերում անօթևան է մնացել 514 000 մարդ, իսկ ուղիղ նյութական կորուստների արժեքը կազմել է 10 միլիարդ ԱՄՆ դոլար։
Երկրաշարժից անմիջապես հետո տարբեր երկրներից հումանիտար օգնության բեռներով Հայաստան էին գալիս օդանավեր, գնացքներ, ավտոմեքենաների շարասյուններ։ Օգնությանը մասնակցում էին աշխարհի 113 երկրներ, բազմաթիվ միջազգային կազմակերպություններ։ Վրաստանից, Ռուսաստանից, Ուկրաինայից, Ղազախստանից և ԽՍՀՄ մյուս հանրապետություններից Հայաստան էին ժամանել հազարավոր փրկարարներ, բժիշկներ, շինարարներ և այլ մասնագետներ։ Նրանք իրենց հետ բերում էին սննդամթերք, բժշկական սարքավորումներ, դեղորայք, վրաններ, շինարարական տեխնիկա և այլն։
Չնայած Սառը պատերազմի լարվածությանը, երկրաշարժից մի քանի օր հետո Խորհրդային միության առաջնորդ Միխայիլ Գորբաչովը պաշտոնապես ԱՄՆ֊ից հումանիտար օգնություն է խնդրել:
Անուրանալի է 1988 թվականի երկրաշարժից Շառլ Ազնավուրի հիմնադրած «Ազնավուրը Հայաստանին» բարեգործական հիմնադրամի գործունեությունը , որը մշտապես աջակցություն է ցուցաբերել երկրաշարժից տուժածներին և շարունակում է ակտիվ գործունեություն ծավալել:
1989 թվականին Rock Aid Armenia բարեգործական երաժշտական ալբոմ և համերգ տեղի ունեցավ Լոնդոնում՝ ի աջակցություն երկրաշարժից տուժածների։ Համերգին մասնակցեցին ռոքային երաժշտական համույթներ, որոնք Լոնդոնի «Metropolis Studios»-ում ձայնագրվեցին բարեգործական նախագծի համար, որ հասույթը տրամադրեն Լենինականի աղետյալ բնակիչներին։
Կառավարության աղետի գոտուց տուժածներին բնակարանային ապահովության հանձնաժողովի ջանքերով 2021 թվականի դեկտեմբերի 7-ի տվյալներով՝ 5 419 ընտանիքից լուծվել է 5 177-ի բնակարանային խնդիրը՝ 67 մլրդ դրամով: Ծրագրի ավարտին, այնուամենայնիվ, մնում է բնակարանամուտ չտոնած 28 ընտանիք:
Երկրաշարժի աղետալի հետևանքները պատմող բազմաթիվ ֆիլմեր են նկարահանվել: Առավել ճանաչում են ստացել Սարիկ Անդրեասյանի «Երկրաշարժ», Ալեքսանդր Կոտտի «Սպիտակ» ֆիմները, որոնք հայ-ռուսական համատեղ արտադրություն են: