Պրահայի հայտարարությունից հետո հայկական կողմի այն ակնկալիքը, թե Ռուսաստանը կհաստատի Ղարաբաղի կարգավիճակի վերաբերյալ իր առաջարկները, ոչ թե բանակցություններ վարելու, այլ մեկ ուրիշ օպերայից է: Այս մասին հայտարարել Է Ռուսաստանի ԱԳ նախարար Սերգեյ Լավրովը եվրոպական անվտանգության խնդիրներին նվիրված մամուլի ասուլիսում:
Ինչպես ընդգծել Է Լավրովը, Մոսկվայի՝ «Ղարաբաղի կարգավիճակը հետաձգելու» առաջարկը նշանակում էր հարցի լուծումը թողնել հաջորդ սերունդների համար:
««Ղարաբաղի կարգավիճակը հետաձգելու» հայեցակարգը շատ պարզ էր և ենթադրում էր, որ հայերը հեռանում են Ղարաբաղի շուրջ գտնվող հինգ ադրբեջանական շրջաններից՝ թողնելով երկու շրջան, որոնք Հայաստանը միացնում են Ղարաբաղին: Ըստ այդ հայեցակարգի՝ այդ երկու շրջանների ճակատագիրը, որոնք ադրբեջանական են և ոչ ոք դա չի վիճարկում, կորոշվի Ղարաբաղի կարգավիճակի որոշման ժամանակ»,-նշել է նա:
«Նախնական շփումների փուլում, երբ պատրաստվում էին եռակողմ հայտարարություններ, երեք եռակողմ գագաթաժողովներ, այն ժամանակ նույնպես խոսում էին այն մասին, որ պետք է ինչ-որ կերպ քաղաքական գործընթաց սկսել: Այդ ժամանակ կար ըմբռնում, որ Ղարաբաղի կարգավիճակը կարելի է հետաձգել ավելի ուշ։ Դրանից ելնելով՝ Ռուսաստանը ձևակերպել է խաղաղության պայմանագրի իր տարբերակը, որը գարնանը փոխանցվել է կողմերին: Այդ այդ կետը ևս կար»,-ընդգծել Է Լավրովը։
ՌԴ ԱԳՆ ղեկավարի խոսքով՝ ադրբեջանական կողմն այն ժամանակ հայտարարել էր, որ գրեթե պատրաստ է աջակցել նշվածին, սակայն կարգավիճակի հարցը պետք է լրացուցիչ մշակվի։
Նա նշել է, որ Սոչիում ռուսական կողմը ցանկանում էր վերադառնալ այդ հարցին. «Ռուսական կողմը նաև ուզում էր հասկանալ, թե որքանով են հայ և ադրբեջանցի գործընկերները պատրաստ գործել այդ «ջենտլմենական ըմբռնման» հիման վրա, որպեսզի լուծեն բոլոր հարցերը, Իսկ Ղարաբաղի կարգավիճակը թողնեն հետագային: Բայց նախագահ Ալիևն ու վարչապետ Փաշինյանը Պրահայից բերեցին այն նույն փաստաթուղթը, որտեղ ասվում էր, որ ուզում են խաղաղության պայմանագիր կնքել՝ առաջնորդվելով ՄԱԿ-ի կանոնադրությամբ և Ալմա-Աթայի հռչակագրով»: