Bugungi kunda ingliz tilini o‘rgatuvchi til markazlari juda ham ko‘payib bormoqda. Buning sababi esa, ingliz tiliga bo‘lgan talabning oshib borayotganidir. Xo‘sh, nega biz ingliz tilini o‘rganishimiz kerak? Nega unga bo‘lgan talab kun sayin ortib bormoqda? Ushbu savollarga javob topishingiz uchun quyida ingliz tilini o‘rganish uchun 5 sababni keltirib o‘tamiz.
1. Ingliz tili dunyodagi eng keng tarqalgan til hisoblanadi
Nima uchun ingliz tili shunchalik muhim? Dunyodagi har besh kishidan biri ingliz tilida gapira oladi yoki hech bo‘lmaganda tushunadi. Sayyorada ushbu til ona tili hisoblangan insonlar soni 400 milliondan ortiqdir. 50 dan ortiq mamlakatlarda ingliz tili rasmiy yoki asosiy aloqa tillaridan biri hisoblanadi.
2. Ushbu til siz uchun yangi imkoniyatlarni ochadi
Ingliz tilini o‘rganishingiz kerakligining yana bir sababi – bu chet elda yoki o‘z yurtingizdagi chet el kompaniyalaridan yaxshigina ish topishingiz mumkinligidir. Ingliz tili – biznes tili hisoblanadi. Shuning uchun ham, chet ellik hamkorlar bilan muzokaralar olib borish uchun ham ushbu tilni o‘rganishingiz kerak bo‘ladi. Qisqa qilib aytganda, ingliz tili karyerangizni qurishingizda muhim o‘rinni egallaydi. Shunday ekan uni o‘rganishni hozirdan boshlang!
3. Ingliz tili ishingizda hurmatga sazovor bo‘lishingizga sabab bo‘ladi
Ishingizda har qanday vaziyatlar bo‘lishi mumkin. Bunday hollarda chet ellik hamkorlar bilan bo‘lgan suhbatlarda ingliz tilini biladigan inson yoki tarjimon kerak bo‘ladi. Bunda siz o‘zingizga ishonib, til bilish qobiliyatlaringizni namoyon etishingiz mumkin. Ish bo‘yicha chet el safarlariga ham til bilganingiz uchun aynan sizni yuborishlari mumkin. Bu bilan siz nafaqat chet eldagi ishlaringizni hal qilasiz, balki o‘zga yurtlarga sayohat qilish imkoniga ham ega bo‘lasiz.
4. Ingliz tili siz uchun dunyodagi eng yaxshi universitetlar eshigini ochadi
Qaysi universitetda o‘qishni istaysiz? Garvard, Stenford, Priston yoki shu kabi universitetlarga hujjat topshirib ko‘rish hech xayolingizga kelganmi? Garchi, bunday universitetlarda o‘qish rejalaringizda bo‘lmasa ham, ingliz tili siz uchun dunyoning ko‘pgina universitetlarining eshiklarini ochib beradi. Ulardan qay birini tanlash esa o‘zingizning xohishingizga bog‘liq.
5. Dunyoviy bilimlarga ega bo‘lish imkonini beradi
Jahon adabiyotlari durdonalari aynan ingliz tilida yozilgan, mashhur filmlar esa ingliz tilida olingan hisoblanadi. Ushbu tilni o‘rgangan holda siz hech qanday tarjima yoki dublyajlarga muhtojlik sezmaysiz. Mashhur asarlarni asl manbalarini o‘qiy olish imkoniga ega bo‘lasiz. Tarjima qilingan filmlarning esa, eng qiziq joylarini o‘xshamagan tarjimalar tufayli o‘tkazib yubormaydiz.
Ingliz tilini o‘rganish sizga dunyoviy bilimlaringizni oshirishda jahon manbalaridan bemalol foydalanishingiz imkonini beradi. O‘z karyerangizni rivojlantirish dunyo bo‘ylab bemalol sayohat qilish, yangidan-yangi tanishlar orttirishga yordam beradi.
