«Технополис Москва» հատուկ տնտեսական գոտին համագործակցության պայմանավորվածություն է ձեռք բերել Հայաստանի երկու ազատ տնտեսական գոտիների՝ «Ալյանս»-ի և «Մեղրիի» հետ։ ТАСС-ի փոխանցմամբ՝ այս մասին չորեքշաբթի լրագրողներին հայտնել է Մոսկվայի ներդրումային և արդյունաբերական քաղաքականության դեպարտամենտի ղեկավար Վլադիսլավ Օվչինսկին։
«Լավագույն փորձի փոխանակումը միջպետական մակարդակում լրացուցիչ խթան կհաղորդի ենթակառուցվածքային հարթակների զարգացմանը և ներդրումների ներգրավմանը։ Մայրաքաղաքի ԱՏԳ-ի բնակիչների համար սա հնարավորություն է ավելացնել արտահանվող արտադրանքի ծավալները և դուրս գալ նոր շուկաներ», - ասել է Օվչինսկին:
Նշվում է, որ տնտեսական գոտիների տարածքներում տեղայնացված ընկերությունները մտադիր են ակտիվորեն տեղեկատվություն փոխանակել, մասնակցել համատեղ նախագծերին և օգնել միմյանց նոր գործընկերներ գտնելու հարցում:
Ինչպես հավելել է «Технополис Москва» ԱՏԳ-ի գլխավոր տնօրեն Գենադի Դեգտևը, դա թույլ կտա հարմարավետ պայմաններ ստեղծել ռուսական և հայկական ձեռնարկությունների միջև աշխատանքի և համագործակցության համար։ «Մոսկվայի հատուկ տնտեսական գոտին պատրաստ է ամրապնդել միջազգային համագործակցությունը բարձր տեխնոլոգիաների պահանջվածության բարձրացման և նորագույն լուծումների ներդրման համար։ Գիտելիքահեն արտադրությունների զարգացման բազմամյա փորձը լավ հիմք կծառայի փոխադարձ երկխոսության կառուցման համար», - նշել է Դեգտևը։
«Ալյանս» ազատ տնտեսական գոտին ստեղծվել է 2013 թվականին, այն առաջին նման տարածքն է Հայաստանում։ Այնտեղ կենտրոնացած են ՏՏ, էլեկտրոնիկայի, ճշգրիտ ճարտարագիտության, դեղագործության, բիոտեխնոլոգիաների, այլընտրանքային էներգետիկայի և հեռահաղորդակցության ոլորտների բարձր տեխնոլոգիական արտադրողները։ Այս ընկերություններից շատերը մասնագիտանում են ներմուծման փոխարինող ապրանքների արտադրության մեջ և զգալի փորձ ունեն այս ուղղությամբ: