Оборона министрлыгы хәбәр итүенчә, бүген Украина хәрби көчләренең пилотсыз очкычлары – дроннары Россия аэродромнарына һөҗүм иткән.
Һөҗүм Рязань өлкәсенең «Дягилево» һәм Саратов өлкәсенең «Энгельс» хәрби аэродромнарына булган. РИА язуынча, дроннар аэродромнарны эштән чыгармакчы булган. Оборона министрлыгы хәбәр итүенчә, пилотсыз очкычлар бәреп төшерелгән. Шул ук вакытта аэродромнардагы ике самолетка зыян килүе, хәрби персонал составындагы 3 хәрбинең һәлак булуы, дүртесенең яралануы хәбәр ителә. Алар очкычларның җиргә төшкән калдыклары нәтиҗәсендә зыян күргән диелә.
Саратов өлкәсенең Энгельс шәһәрендә стратегик бомбардировщиклар базасы урнашкан. Ул аэродромдагы Ту-160, Ту-95МС самолетлары гадәти бомбалардан тыш атом коралын йөртүче самолетлар санала.
Readovka сайты язуынча, пилотсыз очкычлар Харьков өлкәсеннән җибәрелгән булырга мөмкин. Рязань аэродромыннан Украина чигенә кадәр 560 км, ә Энгельска кадәр – 700 км. Сайт язуынча, әгәр Украинада шундый ерак арага оча торган дроннар бар икән, димәк, алар Мәскәүгә дә һөҗүм ясарга мөмкин. Харьковтан Мәскәүгә кадәр – 650 км. (Казанга кадәр – 1100 км).
«Комсомольская правда» күзәтүчесе Коц хәбәр итүенчә, Энгельска һөҗүм совет чорында ясалган ТУ-141 «Стри
ж» беспилотнигы белән ясалган. Андый типтагы дроннар Белгород һәм Курскида бәреп төшерелгән булган инде.
Энгельста дрон шартлаган мизгел видеога эләккән