Կենտրոն վարչական շրջանի աշխատակիցները վերացրել են երեկ՝ նոյեմբերի 15-ին, Երևանում երկու հուշարձանի նկատմամբ տեղի ունեցած վանդալիզմի հետևանքները: Նրանք նախ հեռացրել են հայ պետական և ռազմական գործիչ Գարեգին Նժդեհի արձանի պատվանդանին արված գրությունը, ապա անցել Չարենց-Սայաթ-Նովա խաչմերուկի Արգենտինայի հրապարակում գտնվող արգենտինացի գործիչ, փաստաբան, գեներալ Մանուել Բելգրանոյի հուշարձանի գրությունը մաքրելուն, ասել է աշխատակիցներից մեկը Armenia Today-ի թղթակցին:
Ոստիկանության լրատվության և ԶԼՄ հետ կապի վարչության պետք Զարզանդ Գաբրիելյանը մեզ հայտնեց, որ քաղաքացիներից ահազանգ ստացել են երեկ, փաստաթղթեր են կազմել և ուղարկել Քննչական կոմիտե:
Քննչական կոմիտեն մեր հարցմանն ի պատասխան տեղեկացրեց, որ Երևանի Կենտրոն վարչական շրջանում Գարեգին Նժդեհի և Մանուել Բելգրանոյի հուշարձանները վնասելու փաստի առթիվ ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական երկրորդ բաժնում նախաձեռնվել է քրեական վարույթ՝ ՀՀ քրեական օրենսգրքի 301-րդ հոդվածի 1-ին մասով: Այն է պատմության կամ մշակույթի հուշարձաններ կամ առանձնակի արժեք ունեցող առարկաներ կամ փաստաթղթեր ոչնչացնելը կամ վնասելը: Կատարվում է նախաքննություն:
Երևանի քաղաքապետարանի մամուլի քարտուղար Լևոն Սարդարյանը Armenia Today-ին հայտնեց, որ արձանները ոչ թե քաղաքապետարանի, այլ ԿԳՄՍ նախարարության վերահսկողության տակ են:
Նախարարության մամուլի ծառայությունց խոստացան հարցի մասին մանրամասներ հաղորդել ավելի ուշ
Հիշեցնենք, որ երեկ ֆեյսբուքյան հանրության հետ վանդալիզմի լուսանկարներով է կիսվել հաղորդավար,
մեկնաբան, լրագրող, քաղաքագետ Աբրահամ Գասպարյանը: Նա նշել է, որ Նժդեհը պատահական թիրախ չի դարձել, գրությունը ֆարսիով է, թարգմանաբար նշանակում է «Մահ Խամենեին»: Ըստ Գասպարյանի՝ դա չի տեղավորվում հայության ու Հայաստանի ազգային-պետական գաղափարախոսության, շահերի ու արժեքների համատեքստում: