Պաշտպանության նախարարությունը չի տրամադրել տեղեկություններ Armenia Today-ի՝ Իրանի Իսլամական Հանրապետության հետ ռազմական համագործակցությա մասին հարցման առնչությամբ:
Armenia Today-ը հարցում էր ուղարկել ՊՆ ղեկավար Սուրեն Պապիկյանին՝ խնդրելով տեղեկացնել, թե արդյո՞ք ՀՀ ՊՆ-ն պատրաստվում է զորավարժություն անցկացնել Իրանի հետ, արդյո՞ք այն տեղի կունենա Սյունիքի մարզում և պատրաստվո՞ւմ է ՀՀ-ն իրանական ԱԹՍ-ներ գնել:
Ի պատասխան ՊՆ-ն մերժել է տեղեկությունների տրամադրումը՝ հղում անելով «Տեղեկատվության ազատության մասին» ՀՀ օրենքի 8-րդ հոդվածի առաջին մասին առաջին և ՀՀ կառավարության 1998 թվականի 173-րդ որոշմամբ հաստատված ցանկի 19-րդ կետով:
«Տեղեկատվության ազատության մասին» ՀՀ օրենքի 8-րդ հոդվածի առաջին մասը ենթադրում է, որ տեղեկությունը պարունակում է պետական, ծառայողական, բանկային, առևտրային գաղտնիք:
ՀՀ կառավարության 1998 թվականի 173-րդ որոշմամբ հաստատված ցանկի 19-րդ կետի՝ տեղեկությունը կրում է պետական պաշտպանական պատվերների, սպառազինության և ռազմական տեխնիկայի մատակարարումների ծավալները, դրանց թողարկման արտադրական կարողությունների ծրագրերը (առաջադրանքները) բացահայտող տարրեր:
Ավելի վաղ ՀՀ վարչապետ Նիկոլ Փաշինյանը հայտնել էր, որ աշխատանքներ են կատարվում սպառազինության և տեխնիկայի ձեռքբերման հնարավորությունները դիվերսիֆիկացնելու ուղղությամբ։ Նրա խոսքով՝ եթե որևէ արդյունքի մասին հայտարարելու անհրաժեշտություն կամ նպատակահարմարություն լինի, դրա մասին կհայտարարվի։ Փաշինյանն անդրադարձել էր նաև իր ավելի վաղ հայտարարությանը, ըստ որի՝ Հայաստանի գործընկերներից մեկը երկրին չի մատակարարել արդեն իսկ վճարված զենք։