Биллиилээх саха лиҥкибииһэ, тыл үөрэҕин хандьыдаата, РНА СО ССНК ГЧИ ыстаарсай научнай үлэһитэ, РНА СО үтүөлээх бэтэрээнэ, Саха Өрөспүүбүлүкэтин култууратын үтүөлээх үлэһитэ, «Биһирэм тыл» араадьыйа биэриитин ааптара, Үөһээ Бүлүү улууһун уонна Боотулуу нэһилиэгин Бочуоттаах олохтооҕо Алексеев Михаил Петрович - Дапсы күн сирин көрбүт күнэ - сэтинньи 6 күнэ, биһиги улууспутугар "Биһирэм тыл күнүнэн" биллэриллибитэ.
Үөһээ Бүлүүтээҕи кииннэммит библиотечнай ситим көҕүлээһининэн, бу күн улууспут олохтоохторо, үгэскэ кубулуйбут "Дапсы дьыктаанын" суруйарга холоноллор. Быйылгы ыытыллыбыт дьыктааҥҥа улуус үрдүнэн уопсайа 213 киһи көхтөөх кыттыыны ылла.
Уйбаан Ороһуунускай аатынан Ороһутааҕы модельнай библиотека ыыппыт дьыктааныгар уопсайа сэттэ кыттааччы кэлэн, саха тылыгар билиилэрин таһымын тургутан бардылар.
Быйылгы ыытыллар дьыктаан Михаил Петрович «Ийэ тылбыт өрүттэрин туһугар», (2021 с.) кинигэтиттэн, "Саха тылын анала" тиэкиһэ буолла. Тиэкиһи Ороһу орто оскуолатын саха тылыгар уонна литэрэтиирэтигэр учуутала Кондакова Люция Петровна аахта.
Кыттааччылар субу маннык хабааннаах тэрээһин, сахабыт тылын сүмэтин, баайын-дуолун кэлэр кэнэҕэски ыччакка тиэрдэр аналлааҕын бэлиэтээтилэр.
Туох баар бары кыттыбыт, күүс-көмө буолбут дьоммутугар барҕа махтал тылларын тиэрдэбит. Нэһилиэкпит олохтоохторун аныгыскы дьылга ыытыллар дьыктааҥҥа көхтөөх кыттыыны ылыахтара диэн бука эрэнэбит!