Բելառուսի նախագահ Ալեքսանդր Լուկաշենկոն, ելույթ ունենալով ՀԱՊԿ գագաթնաժողովում, հայտարարել է Հայաստանի և Ադրբեջանի միջև խաղաղության պայմանագրի կնքման հնարավորության մասին։ Նա նաև ասել է, որ ՀԱՊԿ գագաթնաժողովում չընդունված որոշումների նախագծերից մեկի վերաբերյալ փոփոխություններ են առաջարկվել հայկական կողմից։
Խոսելով կազմակերպությունում Բելառուսի նախագահության առաջնահերթությունների մասին՝ Լուկաշենկոն նշել է ՀԱՊԿ անդամ երկրների համախմբվածության բարձրացման, լարվածության նվազեցման և նրանց միջև հակասությունների կարգավորման մասին՝ կազմակերպությունն ամրապնդելու, իր տարածքում անվտանգությունն ու կայունությունը ապահովելու նպատակով։
«Այս մասին մենք շատ ենք խոսել, շատ բան, ինչ քննարկել ենք, իհարկե, ենթակա չէ բացահայտման։ Առաջին անգամ եղավ այսպիսի անկեղծ, արդար խոսակցություն։ Նիկոլ Վովաևիչն ասաց, որ 15 կետերի շուրջ համաձայնության ենք եկել։ Մի կետ, որի շուրջ մենք երկար ժամանակ պայմանավորվել էինք, մեր արտգործնախարարները, մեր հայ գործընկերները փոփոխություններ առաջարկեցին։ Մենք այսօր որոշեցինք դա չընդունել, չխորացնել, բայց առաջին անգամ համաձայնեցինք, և այս ուղղությամբ կոնկրետ շարժում եղավ, որ կան շփման կետեր, որպեսզի համաձայնության գանք»,- ասել է Լուկաշենկոն։
«Դե, ինչպես բոլորս հասկացանք ներկայիս նախագահից [ՀՀ վարչապետ Նիկոլ Փաշինյանից], հայ-ադրբեջանական հակամարտությունը, եթե այսպես վարվենք, ինչպես այսօր քննարկեցինք, ապա այն կավարտվի և խաղաղության պայմանագիր կկնքվի։ Օրինակ՝ ես դա ոգևորությամբ եմ ընդունում»,- ասել է Բելառուսի նախագահը։