Саха сирин үөрэҕин, култууратын министиэристибэтин, Саха Өрөспүүбүлүкэтин Национальнай библиотеката, М.К. Аммосов аатынан ХИФУ Олоҥхо научнай-чинчийэр института, Олоҥхо тыйаатыра Саха Өрөспүүбүлүкэтин Олоҥхо Ассоциацията көҕүлээһиннэринэн сэтинньи 21-26 күннэрэ “Олоҥхо декадатынан” биллэриллэллэр.
РФ Бэрэсидьиэнэ В.В. Путин Ыйааҕынан биллэриллибит РФ норуоттарын култуурунай нэһилиэстибэлэрин Сылын чэрчитинэн, Саха АССР төрүттэммитэ 100 сылынан, Олоҥхо национальнай күнүгэр аналлаах Өрөспүүбүлүкэтээҕи Декада чэрчитинэн ийэ тыл барҕа баайын иҥэриммит олоҥхо тылын-өһүн таба суруйар үөрүйэҕи олохсутар-иҥэрэр, итиэннэ олоҥхо ис хоһоонун нуучча тылынан киэҥ араҥаҕа билиһиннэрэр сыаллаах «Олоҥхо дьыктаана» аахсыйа ыытыллар.
Аахсыйаҕа сааһыттан, идэтиттэн уонна үөрэҕиттэн тутулуга суох баҕалаах барыта кыттыан сөп. Дьыктааны суруйууну улахан дьоҥҥо – библиотека үлэһиттэрэ; үөрэнээччилэргэ, устудьуоннарга – үөрэх, култуура тэрилтэлэрэ тэрийэллэр.
Ороһу нэһилиэгин олохтоохторо эмиэ туора туран хаалбакка акцияҕа көхтөөх кыттыыны ыллылар. Сэтинньи 23 күнүгэр, сабыс-саҥа мас сытынан дыргыйар саха балаҕаныгар, олоҥхо тылын-өһүн билиилэрин таһымын билээри тоҕус киһи муһунна. Бу сырыыга, дьыктаан тиэкиһэ Платон Алексеевич Ойуунускай „Дьурулуйар Ньургун-Боотур“ олоҥхотуттан быһа тардыы буолла.
Дьыктаан суруйан баран, акция кыттыылаахтара итии чэйинэн, алаадьынан күндүлэннилэр, ону тэҥэ Арктикатааҕы судаарыстыбаннай культура институтун устудьуона Афанасий Руфов „Дьурулуйар Ньургун-Боотур“ олоҥхоттон быһа тардан ааҕан улахан сэҥээриини ылла.
Дьыктаан бэрибиэркэтин түмүгүнэн бастыҥ үлэлээх: Романов Петр Романович, Котоконова Екатерина Константиновна, Васильева Раиса Алексеевна, Павлова Таисия Петровна, Васильева Сардаана Николаевна буоллулар.
Акцияҕа көхтөөх кыттыыны ылбыт дьоммутугар барҕа махталбытын тиэрдэбит уонна өрүүтүн да субу курдук сахаҕыт тылын өрүү инники күөҥҥэ илдьэ сылдьаргытыгар баҕарабыт!
P.S. Акция ыытылларыгар сылаас алаадьынан, дөлүһүөн утаҕынан күндүлээбит Екатерина Константиновнаҕа уонна Мария Николаевнаҕа, саха балаҕанын хаһаайкаларыгар "Күбэйэ" түмсүүгэ махталбыт муҥура суох!