Հնդկաստանը Հայաստանին կմատակարարի սեփական արտադրության ATAGS 155 միլիմետրանոց քարշակվող հաուբիցներ, այսօր՝ նոյեմբերի 10-ին, հաղորդել են հնդկական լրատվամիջոցները:
Անգլալեզու Тhe Hindu թերթի տվյալներով՝ պատվերը ստացել է Kalyani Strategic Systems մասնավոր ընկերությունը, որը Bharat Forge ընկերության դուստր ձեռնարկությունն է։ Պարբերականը, վկայակոչելով Kalyani Strategic Systems-ի աղբյուրները, նշում է, որ հաուբիցների մատակարարումը կիրականացվի հնդկական պաշտպանական պետական ծրագրի շրջանակներում և հայրենական արտադրության ռազմական նշանակության արտադրանքի արտահանման վերաբերյալ Նյու Դելիի քաղաքականությանը համապատասխան:
Թերթը չի ճշտում գնորդ երկիրը, սակայն այլ ԶԼՄ-ների տվյալներով՝ խոսքը Հայաստանի մասին է։
Նշվում է, որ սա Հնդկաստանի պատմության մեջ նշված հրետանային համակարգերի առաջին գնումն է արտասահմանյան պատվիրատուի կողմից։ Պայմանագրի գումարը կազմում է 150 մլն դոլար, գործարքը նախատեսվում է իրականացնել երեք տարվա ընթացքում։
Արտադրող ընկերությունում պարզաբանել են, որ ATAGS-ն ունի մինչև 50 կմ խոցման հեռահարություն։
Սա Հայաստանի և հարավասիական տերության միջև առաջին պաշտպանական գործարքը չէ։ Ավելի վաղ հնդկական Solar Group ընկերությունը հայտնել էր Հայաստանի կողմից Pinaka համազարկային կրակի ռեակտիվ համակարգերի գնման մասին համաձայնագրի կնքման մասին։ Քննարկվում է նաև Երևանին Akash հարվածային դրոնների և զենիթահրթիռային համալիրի (ԶՀՀ) մատակարարումը։