Հարավային Կովկասում այսօր ձևավորվում է «Հյուսիս – Հարավ» և «Արևելք – Արևմուտք» հիմնական միջազգային տրանսպորտային միջանցքների խաչմերուկ։
ՌԴ կառավարության մամուլի ծառայության փոխանցմամբ, այս մասին հայտարարել է Ռուսաստանի փոխվարչապետ Ալեքսեյ Օվերչուկը:
Ըստ նրա՝ դրա ստեղծման դեպքում Ադրբեջանի, Հայաստանի և Վրաստանի տնտեսությունը կսկսի լրացուցիչ վարձավճար ստանալ՝ կապված Եվրասիայում իրենց աշխարհագրական դիրքի առավելության հետ։ «Այս առումով էական դեր կխաղա Ադրբեջանի արևմտյան շրջանների և Նախիջևանի միջև Հայաստանի կամ Իրանի տարածքով տրանսպորտային հաղորդակցության ապաշրջափակումը»,-հայտարարել է նա։
«Այսօր Ադրբեջանն ու Իրանը ձեռնամուխ են եղել սահմանին կամուրջների կառուցմանը, որոնք կկապեն երկու երկրների մայրուղիները և թույլ կտան ապահովել Ադրբեջանի արևմտյան շրջանների և Նախիջևանի միջև ամենակարճ և հարմարավետ երթևեկությունը։ Հայաստանի տարածքով Մեղրիով երկաթգծի և ավտոմոբիլային ճանապարհի կառուցումը, որի ինքնիշխանությունը ոչ մեկի կողմից կասկածի տակ չի դրվում, կախված է Հայաստանի դիրքորոշումից։ Ընդ որում, Հայաստանը շրջանցող ճանապարհն արդեն կառուցվում է Իրանի տարածքով, Այսինքն՝ մինչև 2024 թվականը ճանապարհը կլինի, և այն կապահովի մուտքը դեպի Իրանի, Թուրքիայի և հետագայում Եվրոպայի շուկաներ»,-ընդգծել է ՌԴ փոխվարչապետը։
Նշենք, որ վարչապետի հատուկ հանձնարարություններով դեսպան Էդմոն Մարուքյանը հայտարարել է, որ Հայաստանը իր տարածքում «միջանցք» տրամադրելու պարտավորություն չի ստանձնել։ «Ոչ գրավոր, ոչ բանավոր Հայաստանը միջանցք տրամադրելու որևէ պարտավորություն չի ստանձնել։ Բոլոր նրանք, ովքեր պնդում են, որ Հայաստանը նման բան է խոստացել, ցանկալին իրականության տեղ են ընդունում»,-հայտարարել է նա։
Լրացուցիչ տեղեկությունների համար այցելեք կայք