ՌԴ-ն ավարտում է ռուս-ադրբեջանական սահմանին անցակետերի արդիականացումը «Հյուսիս-Հարավ» տրանսպորտային միջանցքի զարգացման համար։ ՌԴ կառավարության մամուլի ծառայության փոխանցմամբ, այս մասին հայտարարել է Ռուսաստանի փոխվարչապետ Ալեքսեյ Օվերչուկը:
Նրա խոսքով՝ ՌԴ-ի վրա պատժամիջոցային ճնշումը դրդել և արագացրել է Ռուսաստանի՝ համաշխարհային տնտեսական ակտիվության ձևավորվող կենտրոնների վերակողմնորոշման վերաբերյալ որոշումները։ «Հյուսիս-Հարավ ուղղության զարգացման առավելություններն այսօր ակնհայտ են ոչ միայն Ռուսաստանի, այլև ԵԱՏՄ-ի և ԱՊՀ-ի մեր ամենամոտ հարևանների համար։ Ընդ որում, մեր երկրների համար «Արևելք – Արևմուտք» միջանցքի համեմատ այս ուղղության շահավետությունը պայմանավորված է այդ երթուղիների տնտեսական տարբեր իմաստներով։ Այն դեպքում, երբ «Արևելք – Արևմուտք» միջազգային տրանսպորտային միջանցքի ֆունկցիոնալությունն առավելապես տարանցիկ բնույթ է կրում, այսինքն՝ մենք մեր ճանապարհներով չինական բեռներ ենք տեղափոխել Եվրոպա, «Հյուսիս – Հարավ»-ն աջակցում է ԵԱՏՄ և ԱՊՀ երկրների բոլոր տնտեսությունների արտահանման զարգացմանը, ինչը կանխորոշում է այդ ուղղությամբ ընդհանուր շահագրգռվածություն», – կարծում է նա։
Օվերչուկի խոսքով՝ «Հյուսիս-Հարավ»-ի զարգացման շրջանակներում վերսկսվել են Իրանի Ռեշտ – Աստարա երկաթգծի 160 կիլոմետրանոց հատվածի շինարարության շուրջ բանակցությունները, ընթանում է Գարմսար-Ինչե Բուրուն երկաթուղու էլեկտրաֆիկացումը, ինչպես նաև նախատեսվում է այդ տարածաշրջանում երկաթուղային երթևեկության միջին արագության բարձրացման աշխատանքների համալիր: «Ռուսաստանը, Ադրբեջանը և Իրանը բանակցություններ են վարում արևմտյան երթուղու եռակողմ տրանսպորտային-լոգիստիկ օպերատորի ստեղծման շուրջ, ինչը թույլ կտա կառավարել բեռնահոսքը, ներդաշնակեցնել սահմանային հսկողության ընթացակարգերը և ապահովել Պարսից ծոցի նավահանգիստներից մինչև Բալթիկ ծով և հակառակ ուղղությամբ ապրանքների անխափան անցումը», – հավելել է նա:
Լրացուցիչ տեղեկությունների համար այցելեք կայք