ԱՄՆ-ի, Մեծ Բրիտանիայի, Իսրայելի և Սաուդյան Արաբիայի հատուկ ծառայությունները մեղսակից են Իրանում տեղի ունեցած անկարգություններին։ Այս մասին ТАСС-ի փոխանցմամբ՝ ասված է Իսլամական Հանրապետության հետախուզության նախարարության և Իսլամական հեղափոխության պահապանների կորպուսի (ԻՀՊԿ, իրանական զինված ուժերի էլիտար ստորաբաժանումներ) հետախուզական ծառայության տարածած համատեղ հայտարարության մեջ։
Ինչպես նշվում է հայտարարության մեջ, որի բովանդակությունը ներկայացնում է Al-Alam հեռուստաալիքը, ԱՄՆ ԿՀՎ-ն, Մեծ Բրիտանիայի հատուկ ծառայությունները, իսրայելական «Մոսադ» հետախուզությունը և Սաուդյան Արաբիայի հետախուզությունը «ակնհայտ դեր են խաղացել [Իրանում] անկարգությունների և բռնության մեջ»: Նպատակը երկրում «անվտանգության խաթարումն» էր։ Նշվում է, որ «անկարգությունների մեծ մասի պլանավորումն ու գործնական իրականացումն իրականացվել է «Մոսադի» կողմից՝ թաքֆիրիստական խմբավորումների հետ համագործակցությամբ»։
Նշվում է նաև, որ նշված երկրների հատուկ ծառայությունները Իրանի ներսում գործող իրենց գործակալական ցանցերին «ռազմական և լրտեսական սարքավորումներ» են ուղարկել, իսկ ամերիկյան հետախուզությունը նույնիսկ զբաղվել է իր իրանցի գործակալների մարզմամբ, որոնց թվում էր նաև Մահսա Ամինիի առաջին լուսանկարի հեղինակը, որն արվել է հիվանդանոցում գտնվելու ժամանակ:
Իրանում արդեն մեկ ամսից ավելի է, ինչ չեն հանդարտվում այն հուզումները, որոնք սկսվել են 22-ամյա Մահսա Ամինիի հուղարկավորությունից հետո, որը մահացել է սեպտեմբերի 16-ին: Պաշտոնական վարկածի համաձայն՝ ոստիկանությունը ձերբակալել է Ամինին գլխաշոր սխալ կրելու համար։ Հարցաքննության ժամանակ նա սրտի կաթված է ունեցել, որից մահացել է։ Սոցիալական ցանցերում, սակայն, տեղեկություն է տարածվել, որ Ամինին ծեծի է ենթարկվել ոստիկանների կողմից։ Հոկտեմբերի 7-ին իրանական դատական բժշկության կազմակերպությունը պաշտոնական եզրակացություն է հրապարակել աղջկա մահվան պատճառների մասին, որում նշվում է, որ նրան վնասվածքներ չեն պատճառել:
Լրացուցիչ տեղեկությունների համար այցելեք կայք