Եվրամիության քաղաքացիական առաքելության թիմը հայ-ադրբեջանական սահմանի համար արդեն Հայաստանում է, այն օպերատիվ կծավալվի։ Այս մասին ТАСС-ի փոխանցմամբ՝ հայտարարել է ԵՄ դիվանագիտության ղեկավար Ժոզեպ Բորելը՝ Լյուքսեմբուրգում Եվրամիության երկրների արտաքին գործերի նախարարների նիստի արդյունքներին նվիրված մամուլի ասուլիսի ժամանակ։
«Մեր թիմն արդեն Հայաստանում է, առաքելությունը կլինի արագ»,-ասել է նա։ Իր հերթին ԵԽ նախագահ Շառլ Միշելը ողջունել է քաղաքացիական առաքելության արագ տեղակայումը։ Այս մասին Twitter-յան իր միկրոբլոգում գրել է նա։ «Այն կօգնի ամրապնդել վստահությունը և թույլ կտա ԵՄ – ին ավելի լավ աջակցել սահմանային հանձնաժողովներին, որոնք շուտով կհանդիպեն Բրյուսելում»,-գրել է եվրոպացի պաշտոնյան։
Հայաստանն ու Ադրբեջանը համատեղ հայտարարություն են ընդունել հոկտեմբերի 6-ին Պրահայում Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի, Ֆրանսիայի նախագահ Էմանուել Մակրոնի և Եվրոպական խորհրդի նախագահ Շառլ Միշելի հանդիպման արդյունքներով։ Հայտարարության համաձայն, Հայաստանը, մասնավորապես, համաձայնել է խրախուսել ԵՄ քաղաքացիական առաքելությունը Ադրբեջանի հետ սահմանին։ Առաքելությունն իր աշխատանքը կսկսի հոկտեմբերին՝ առավելագույնը երկու ամիս ժամկետով։ Առաքելության նպատակն է լինելու վստահություն ստեղծել և օգնել սահմանային հանձնաժողովներին իրենց զեկույցների միջոցով։
Լրացուցիչ տեղեկությունների համար այցելեք կայք