Թուրքիայի արտաքին գործերի նախարար Մևլութ Չավուշօղլուն հույս ունի առաջընթացի հասնել Անկարայի և Երևանի միջև հարաբերությունների կարգավորման գործընթացում, հայտնում է ՌԻԱ Նովոստի-ն։
«Սա բարենպաստ իրավիճակ կստեղծի տարածաշրջանում»,- ասել է նա Հայաստանի արտգործնախարար Արարատ Միրզոյանի հետ հանդիպումից հետո։
Չավուշօղլուն նշել է, որ Միրզոյանի հետ քննարկել են երկու երկրների հարաբերությունների կարգավորման գործընթացում հնարավոր քայլերը, և կողմերը պայմանավորվել են արագացնել դրանք։
Հիշեցնենք, որ փետրվարի 6-ի առավոտյան 7,8 մագնիտուդով երկրաշարժը տեղի է ունեցել Թուրքիայի հարավ-արևելյան հատվածում և Սիրիայի հյուսիսում: Հաջորդ օրը Թուրքիայի կենտրոնական հատվածում 7 բալ ուժգնությամբ նոր հզոր երկրաշարժ է տեղի ունեցել։
ՀՀ վարչապետ Նիկոլ Փաշինյանը ցավակցական հեռագիր է հղել Թուրքիայում և Սիրիայում տեղի ունեցած երկրաշարժի կապակցությամբ և հայտնել, որ Հայաստանը պատրաստ է օգնություն ցուցաբերել: Հայաստանի ներքին գործերի նախարարությունը փետրվարի 7-ին հաղորդել է երկրաշարժից տուժած շրջաններում որոնողափրկարարական աշխատանքներին աջակցելու նպատակով Սիրիա և Թուրքիա փրկարարական ջոկատներ ուղարկելու մասին:
Հայաստանի ԱԳ նախարար Արարատ Միրզոյանի գլխավորած պատվիրակությունն այսօր ժամանել է Անկարա։ Միրզոյանը երկրաշարժից տուժած Ադիյաման քաղաքում կհանդիպի որոնողափրկարարական աշխատանքներ իրականացնող ՀՀ փրկարարական խմբին: Միրզոյանը Չավուշօղլուի հետ հանդիպմանը վերահաստատել է Թուրքիայի հետ սահմանի բացման հարցում ՀՀ պատրաստակամությունը։