Պաշտպանության նախարարը չի կարող տեղյակ լինել բոլոր մանրամասներին, բանակում գույքի օտարումը կամ ձեռքբերումը կատարվել է ՊՆ մասնագիտացված գերատեսչությունների եզրակացությունների հիման վրա։ Այս մասին խորհրդարանական ճեպազրույցների ժամանակ ասաց ՊՆ նախկին նախարար, «Հայաստան» խմբակցություն Սեյրան Օհանյանը՝ մեկնաբանելով իրեն առաջադրված մեղադրանքը։
Օհանյանը նշեց, որ գործում մի քանի անգամ հիշատակվել է «զորամաս» բառը, սակայն դա զորամաս չի եղել։ Օհանյանի խոսով՝ նպատակն ակնհայտ է՝ մոլորեցնել հանրությանը, քանի որ խոսքն իրականում ոչ թե զորամասի մասին է, այլ հին հողատարածքների ու խարխլված շենքերի, որոնք այլևս օգտագործման ենթակա չեն եղել։ Դրանք պահելն ավելի մեծ բեռ է եղել։
Օհանյանը նշեց, որ քրեական հետապնդում չէր կարող լինել, եթե ինքը խնդրեր հաշվի առնել վաղեմության ժամկետը, բայց դա չի արել սկզբունքային նկատառումներից ելնելով, քանի որ իրեն անմեղ է համարում։
«Սրանք շինծու գործեր են, որոնք հորինված են, որպեսզի շեղեն հանրության ուշադրությունը արդի խնդիրներից, այդ թվում՝ անվտանգային։ Մենք անձնական շահեր չենք հետապնդել, որևէ շրջանակի հետ պայմանավորվածություն ձեռք չենք բերել»,- ընդգծել է պաշտպանության նախկին նախարարը։
Նրա խոսքով՝ մեղադրանքը առաջադրվել է, գործերը գտնվում են դատական համակարգում, որտեղ իրենք կապացուցեն և հանրությանը կներկայացնեն անմեղությունը։
ՀՀ գլխավոր դատախազ Աննա Վարդապետյանը, համաձայն «ԱԺ կանոնակարգ» սահմանադրական օրենքի 108-րդ հոդվածի 1-ին կետի (պատգամավորների ընդհանուր թվի առնվազն մեկ քառորդի պահանջով՝ ԱԺ իրավասության մեջ մտնող և հանրային հետաքրքրություն ներկայացնող հարցերին վերաբերող փաստերը պարզելու և դրանք ԱԺ ներկայացնելու նպատակով, իրավունքի ուժով ստեղծվում է ԱԺ քննիչ հանձնաժողով), հունվարի 20-ին ՀՀ ազգային ժողովի նախագահ Ալեն Սիմոնյանին է ներկայացրել ԱԺ «Հայաստան» խմբակցության ղեկավար, ՀՀ պաշտպանության նախկին նախարար Սեյրան Օհանյանի նկատմամբ քրեական հետապնդում հարուցելուն համաձայնություն տալու մասին երեք միջնորդագիր:
Գերատեսչությունից հայտնում են, որ ըստ նույն կետի պահանջի՝ միջնորդագրին կցվել է նաև պատգամավորի նկատմամբ քրեական հետապնդում հարուցելուն համաձայնություն տալու մասին Ազգային ժողովի որոշման նախագիծը:
Նշվում է, որ առաջին քրեական վարույթով ձեռք բերված փաստական տվյալների համաձայն՝ ՀՀ պաշտպանության նախկին նախարարը, օգտագործելով պաշտոնեական դիրքը կատարել է առանձնապես խոշոր չափերով վատնում (երկու դրվագ), ինչպես նաև՝ անձնական այլ շահագրգռվածությունից և խմբային շահերից ելնելով, իր պաշտոնեական դիրքն օգտագործել է ծառայության շահերին հակառակ, որն անզգուշությամբ առաջացրել է ծանր հետևանքներ (երկու դրվագ)։
Երկրորդ քրեական վարույթով ձեռք բերված փաստական տվյալների համաձայն՝ ՀՀ պաշտպանության նախկին նախարարը, հանդիսանալով պաշտոնատար անձ, խմբային շահերից ելնելով, պաշտոնեական դիրքն օգտագործել է ծառայության շահերին հակառակ, նաև չի կատարել ծառայողական պարտականությունները, որն անզգուշությամբ առաջացրել է ծանր հետևանքներ, ինչպես նաև՝ վատնելու եղանակով հափշտակել է առանձնապես խոշոր չափերի գույք:
Երրորդ քրեական վարույթով ձեռք բերված փաստական տվյալների համաձայն՝ ՀՀ պաշտպանության նախկին նախարարը վատնելու եղանակով հափշտակել է առանձնապես խոշոր չափերի գույք: ՀՀ Սահմանադրության 96-րդ հոդվածի համաձայն՝ պատգամավորի նկատմամբ քրեական հետապնդում կարող է հարուցվել միայն Ազգային ժողովի համաձայնությամբ:
Մանրամասները՝ տեսանյութում։