Թուրքիայում փետրվարի 6-ին տեղի ունեցած երկրաշարժի հետևանքով ամբողջությամբ փլուզվել է մահմեդականների մոտ հայտնի Հաբիբ ի Նեջար մզկիթը, որը գտնվում է Հաթայ նահանգում: Այս մասին РИА новости-ի փոխանցմամբ՝ հայտնում է TRT Haber հեռուստաալիքը՝ հստակեցնելով, որ պատմության հուշարձանը կարևոր է եղել ոչ միայն Թուրքիայի, այլև ողջ իսլամի համար։
Հաբիբ ի Նեջարը համարվում էր առաջին մզկիթը ողջ Անատոլիայում։
«Թուրքիայի Հաթայ նահանգի Հաբիբ ի Նեջար մզկիթը, որը 14-րդ դարի պատմություն ունի, ավերվել է երկրաշարժի ժամանակ»,- հաստատել են թուրք լրագրողները։
Ավերված մզկիթը կառուցվել է դեռևս 638 թվականին այն ժամանակ իշխող մահմեդական արաբների կողմից։ Երկրում այն պաշտոնապես կրում էր ամենահինի կարգավիճակը:
Հիշեցնենք, որ փետրվարի 6-ի առավոտյան 7,8 մագնիտուդով երկրաշարժը տեղի է ունեցել Թուրքիայի հարավ-արևելյան հատվածում և Սիրիայի հյուսիսում: Հաջորդ օրը Թուրքիայի կենտրոնական հատվածում 7 բալ ուժգնությամբ նոր հզոր երկրաշարժ է տեղի ունեցել։
ՀՀ վարչապետ Նիկոլ Փաշինյանը ցավակցական հեռագիր է հղել Թուրքիայում և Սիրիայում տեղի ունեցած երկրաշարժի կապակցությամբ և հայտնել, որ Հայաստանը պատրաստ է օգնություն ցուցաբերել: Հայաստանի ներքին գործերի նախարարությունը փետրվարի 7-ին հաղորդել է երկրաշարժից տուժած շրջաններում որոնողափրկարարական աշխատանքներին աջակցելու նպատակով Սիրիա և Թուրքիա փրկարարական ջոկատներ ուղարկելու մասին: