Թուրքիայի ութ նահանգներում 48 մարդ է ձերբակալվել երկրաշարժից հետո կողոպուտի կասկածանքով։ РИА новости-ի փոխանցմամբ՝ հաղորդում է TRT Haber հեռուստաալիքը:
Թուրքիայում երկրաշարժերի զոհերի թիվը, ըստ վերջին տվյալների, հասել է 22 327-ի, վիրավորների թիվը հասել է 80 278-ի, ավելի վաղ հայտնել էր երկրի առողջապահության նախարար Ֆահրեթին Քոջան:
«Քառասունութ կասկածյալներ ձերբակալվել են ութ նահանգներում՝ երկրաշարժի շրջանում գողությունների և կողոպուտների պատճառով», - հայտնել է հեռուստաալիքը:
Հիշեցնենք, որ փետրվարի 6-ի առավոտյան 7,8 մագնիտուդով երկրաշարժը տեղի է ունեցել Թուրքիայի հարավ-արևելյան հատվածում և Սիրիայի հյուսիսում: Հաջորդ օրը Թուրքիայի կենտրոնական հատվածում 7 բալ ուժգնությամբ նոր հզոր երկրաշարժ է տեղի ունեցել։
ՀՀ վարչապետ Նիկոլ Փաշինյանը ցավակցական հեռագիր է հղել Թուրքիայում և Սիրիայում տեղի ունեցած երկրաշարժի կապակցությամբ և հայտնել, որ Հայաստանը պատրաստ է օգնություն ցուցաբերել: Հայաստանի ներքին գործերի նախարարությունը փետրվարի 7-ին հաղորդել է երկրաշարժից տուժած շրջաններում որոնողափրկարարական աշխատանքներին աջակցելու նպատակով Սիրիա և Թուրքիա փրկարարական ջոկատներ ուղարկելու մասին: