Փետրվարի 15-ից նույնականացման քարտ ստացող քաղաքացիները, նույնականացման քարտերում չունենալով էլեկտրոնային նույնականացման գործիքակազմ, անհրաժեշտություն չեն ունենա նույնականացման քարտի ընթերցող սարքով գրանցվել բջջային էլեկտրոնային նույնականացման կամ ստորագրության լուծման համար: Կառավարության փետրվարի 9-ին ընդունած որոշման համաձայն՝ տելեկոմ օպերատորներին կթույլատրեն հաճախորդներին գրանցել իրենց գրասենյակներում։
Նշվածից զատ՝ որդեգրված թվային բարեփոխումների ներքո նպատակ ունենալով անվտանգ և միասնական ստանդարտներին համահունչ առցանց միջավայր ապահովել ծառայությունների առցանց մատուցման համար՝ Կառավարությունը ներդնում է ազգային նույնականացման միասնական մուտքի (պատուհան, national identification gateway) «Ես եմ» համակարգը: Այն պարունակում է այլընտրանքային լուծումներ՝ քաղաքացիների համար ընդլայնելով նույնականացման մուտքի հնարավորությունները:
Նախագծով նաև ապահովվում է, որ «Ես եմ» ազգային նույնականացման հարթակը պարտադիր կերպով հանդիսանալու է պետական ծառայությունների մատուցման մուտքի պատուհանը:
«Ես եմ» ազգային նույնականացման հարթակը տեղակայվելու է yesem.am կամ yesem.e-gov.am տիրույթներում: