ԵԱՏՄ անդամ-երկրների ազգային օրենսդրություններում կան կետեր, որոնք հակասում են կազմակերպության իրավապայմանագրային բազայի տառին և ոգուն և մենք աշխատում ենք այդ ամենի հարթեցման ուղղությամբ։ Այս մասին ԱԺ-Կառավարություն հարցուպատախսանի ժամանակ հայտարարեց վարչապետ Նիկոլ Փաշինյանը։
Ըստ նրա՝ դրանցից մեկը գազի միասնական շուկայի մասին է։ «Այդ ուղղությամբ պետք է խոստովանել, որ հսկայական աշխատանք է կատարվել, բայց կան նրբություններ, որոնք կարիք ունեն հասցեագրման և լուծման և մեր ընկալումն այն է, որ կա ըմբռնում, որ պետք է շարունակենք քննարկումները մինչև այդ հարցերի լուծումը».-նշեց նա։
Վարչապետն անդարադարձավ նաև տարածաշրջանային կոմունիկացիաների բացման վերաբերյալ իշխանական պատգամավոր Շիրակ Թորոսյանի հարցին։ «Ինչ վերաբերում է տարածաշրջանային կոմունիկացիաների բացմանը, այո՛, ակնհայտ է, որ մենք, ըստ էության, ԵԱՏՄ-ի հետ մեկ կապող օղակ ունենք՝ Վերին Լարսի ճանապարն է՝ իր բոլոր հայտնի պրոբլեմներով, օբյեկտիվորեն անհաղթահարելի պրոբլեմներ, քանի որ ոչ մեկ չի կարող կառավարել ձնաբքերը, հեղեղումները և այլն։ Տեղյակ եք նաև, որ մեր վրաց գործընկերները նախաձեռնել են թունելի կառուցումը, որը խնդիրը մեծավմասամբ կլուծի։ Մենք նաև հասկանում ենք, որ տարածաշրջանային կոմունիկացիաների բացումը, մասնավորապես Հայաստանից Ադրբեջան երկաթուղային կապի բացումը մեծապես կմեծացնի մեր առևտրաշրջանառությունը ԵԱՏՄ և ոչ միայն ԵԱՏՄ երկրների հետ։ Պետք է նշեմ, որ այն ինչ գրված է Եռակողմ հայտարարության 9-րդ կետում, մենք պատրաստ ենք իրականացնել։ Տպավորություն կա, թե բոլորն ուզում են այդ ճանապահը բացել, մենք դիմադրում ենք, ընդհակառակը, ամենաշատը մենք ենք ուզում, որ ճանապարհները բացվեն և դիմադրում են մյուսները»,-հայտարարեց Փաշինյանը։