Իշխանական որոշ ներկայացուցիչներ ու իշխանամերձ փորձագետներ սկսել են խոսել Արցախի գնի մասին: Այս մասին ԱԺ հայտարարությունների ժամին ասաց «Հայաստան» խմբակցության պատգամավոր Արթուր Խաչատրյանը՝ նշելով, որ դրա մասին խոսք պետք է չլիներ, քանի որ հայրենիքը չի վաճառվում, այն անգին է:
«Իշխանության որոշ ներկայացուցիչներ խոսում են Արցախի համար պայքարելու գնի մասին՝ փորձելով մարդկանց ուղեղը թունավորել ազգադավ մի ախտով՝ արժի՞ այդքան վճարել»,- ասաց պատգամավորը:
Նրա խոսքով՝ շաբաթներ առաջ ՀՀ ԱԽ քարտուղար Արմեն Գրիգորյանը հայտարարել էր, որ Հայաստանին առաջարկել են միանալ միութենական պետությանը, սակայն հարցերին, թե ով, երբ ու ինչ պայմաններում է ՀՀ ինքնիշխանությունը սակարկման առարկա դարձրել, չպատասխանեց: Իսկ ՌԴ-ից եկած հարցերին պատասխանեց՝ լսել է:
«Այսպիսով՝ Հայաստանում ոմանք սկսեցին կշռել՝ Արցախ, թե ինքնիշխանություն: Հարց, որը երբեք չի քննարկվել ու օրակարգային չի եղել»,- ասաց պատգամավորը:
Նա հավելեց, որ իշխանական մի փորձագետ էլ հանրայինի եթերում է հակադրել Արցախը Մեղրիին, իբրև թե Արցախի գինը Մեղրին է: Մեկ այլ կարծիք էլ, Խաչատրյանի խոսքով՝ 28 900 քառակուսի մետրը պահելու դեմ Արցախը տալն է, որն ամենակործանարարն է:
Մանրամասները՝ տեսանյութում: