Կենտրոնական Ասիայի երկրների տնտեսությունների աճը 2023 թվականին կկազմի 4,9 տոկոս, իսկ 2024 թվականին՝ 5,4 տոկոս։ РБК-ի փոխանցմամբ՝ նման գնահատական է տվել Վերակառուցման և զարգացման եվրոպական բանկը (ՎԶԵԲ) իր զեկույցում:
Ինչպես նշվում է փաստաթղթում, աճի արագացումը կապված է ենթակառուցվածքներում ներդրումների ներհոսքի, էներգակիրների բարձր գների և ռուսաստանյան բիզնեսի ռելոկացիայի հետ: «Սեպտեմբերի համեմատ ոչ մեծ վերանայումն արտացոլում է հումքային ապրանքներ արտահանող երկրներում նավթի և գազի գների բարձրացումը և աշխատուժի, կապիտալի և դրամական փոխանցումների ներհոսքի ավելացումը, ինչպես նաև միջնորդների միջոցով առևտրի ընդլայնումը», — նշվում է զեկույցում:
Վերակառուցման և զարգացման եվրոպական բանկը (ՎԶԵԲ) հիմնադրվել է 1991 թվականին՝ Կենտրոնական Եվրոպայից մինչև Կենտրոնական Ասիա երկրներում շուկայական տնտեսություններին աջակցելու համար:
Ղազախստանում, Ղրղզստանում, Մոնղոլիայում, Տաջիկստանում, Թուրքմենստանում և Ուզբեկստանում միջինացված տնտեսական աճը 2023 թվականին ակնկալվում է ամենաբարձր մակարդակով բոլոր այն երկրների շարքում, որտեղ Բանկն իրականացնում է իր գործունեությունը (ընդհանուր կանխատեսումը բոլոր տարածաշրջանների համար 2,1% աճ է): Իրական ՀՆԱ-ն ամենից շատ կաճի Տաջիկստանում (8 տոկոս), Ղրղզստանում և Մոնղոլիայում (7-ական տոկոս), Թուրքմենստանում և Ուզբեկստանում (6,5-ական տոկոս): Ղազախստանում այն կլինի 3,5 տոկոսի մակարդակում։
Զեկույցում նաև նշվում է, որ Կենտրոնական Ասիայի (Ղրղզստան, Ղազախստան և Ուզբեկստան) և Անդրկովկասի (Հայաստան և Վրաստան) երկրներում 2022 թվականի սեպտեմբեր—հոկտեմբեր ամիսներին իրական աշխատավարձի աճ է գրանցվել՝ ի տարբերություն ՎԶԵԲ-ի ներկայության մյուս երկրների: Փաստաթղթի համաձայն՝ դա ամրապնդվել է ինչպես արտահանման և ներմուծման աճով, այնպես էլ ներդրումների հոսքով և Ռուսաստանից կրթված միգրանտների ժամանմամբ, ինչպես նաև էներգակիրների բարձր գներով:
Ինչպես նշել են փորձագետները, ԵՄ-ից, Մեծ Բրիտանիայից և ԱՄՆ-ից Միջին Ասիա և Կովկաս արտահանումը կտրուկ աճել է, ինչը վկայում է միջնորդական առևտրի աճի մասին. ապրանքներն արտահանվում են Կենտրոնական Ասիայի երկրներ, այնուհետև՝ վերավաճառվում Ռուսաստան: Հայաստանում և Ղրղզստանում նման առևտուրը կազմել է ՀՆԱ-ի 4-6% - ը: Այն հանգեցրել է լոգիստիկայի ոլորտի աճին, որն աջակցում է դոլարի նկատմամբ տեղական արժույթի ամրապնդմանը, նշել են ՎԶԵԲ-ում: