Գույքահարկի թեման՝ վեճի առարկա համայնքի եւ կառավարության միջեւ

ԱՀ համայնքները գույքահարկի հավաքագրման գործընթացում կանգնած են լուրջ խնդրի առաջ, կարծում է Հադրութի քաղաքապետ Վահան Սավադյանը։ Ըստ համայնքի ղեկավարի՝ համաձայն ԱՀ գույքահարկի մասին օրենքի 10 հոդվածի՝ ֆիզիկական անձանց համար գույքահարկի հաշվետու ժամանակաշրջան է համարվում օրացուցային տարին, ինչը փաստացի նշանակում է, որ համայնքապետարանը իրավասու չէ պահանջել գույքահարկ վճարողներից ժամանակից շուտ մարել իրենց պարտավորությունները, ինչի հետևանքով հավաքագրումը 100 տոկոսով չի իրականացվում, ֆինանսավորումը ևս չի իրականացվում և որպես հետևանք համայնքապետարանը պլանավորված աշխատանքները չի կարողանում իրականացնել։  Խնդրի լուծման համար Հադրութի համայնքապետարանը դիմել էր ԱՀ կառավարությանը, որպեսզի փոխառության կարգով Հադրութ համայնքին տրամադրվի 4 մլն ՀՀ դրամ, որը կվերադարձվի տարեվերջին։ Սակայն ի պատասխան հարցմանը, ԱՀ ֆինանսների նախարարությունը ասել էր, որ առաջարկում են ուսումնասիրել Հադրութ համայնքի 2020 թ․ բյուջեի թերկատարման պատճառները և ստացված արդյունքների հիման քննարկել խնդրի լուծման տարբերակները։

ԱՀ տարածքային կառավարման եւ զարգացման նախարար Ժիրայր Միրզոյանը

Խնդրի լուծման համար համայնքապետարանը դիմել էր նաև ԱՀ տարածքային կառավարման և զարգացման նախարարություն, սակայն այս դեպքում ևս հարցին լուծում չի տրվել։ Մեր հարցմանը ի պատասխան Տարածքային կառավարման եւ զարգացման նախարար Ժիրայր Միրզոյանը կարևոր է համարում ընդգծել այն փաստը, որ համայնքապետարանը բացի գույքահարկից եկամտի այլ աղբյուրներ ևս ունի: «Իսկ ինչ վերաբերում է գույքահարկին, ապա օրենքով սահմանված կարգով կազմակերպությունները գույքահարկը վճարում են յուրաքանչյուր կիսամյակ՝ մինչև տվյալ կիսամյակին հաջորդող ամսվա 20-ը ներառյալ, իսկ ֆիզիկական անձինք համապատասխան բյուջե են վճարում մինչև հաշվետու տարվա դեկտեմբերի 1-ը ներառյալ: Կարևոր է նաև այն, որ պլանավորված գույքահարկի ընդհանուր գումարի ավելի քան 85 տոկոսը փոխադրամիջոցների գույքահարկն է, որը վճարվում է ոչ թե դեկտեմբերին, այլ ամբողջ տարվա ընթացքում՝ պայմանավորված տրանսպորտային միջոցների տեխնիկական զննության անցկացման ժամկետով: Ստացվում է, որ Հադրութ համայնքում և, ընդհանրապես, նման խնդիրներ ունեցող համայնքներում ոչ թե իրավական կամ ծրագրային ժամկետների խնդիրներ կան, այլ բյուջեի սխալ պլանավորման և եկամուտների հավաքագրման թույլ կարգապահության»-նշել է նախարարն artsakhnow.am-ին տված իր մեկնաբանության մեջ:

Հադրութի քաղաքապետ Վահան Սավադյանը

Քաղաքապետ Վահան Սավադյանը պնդում է, որ այնուամենայնիվ  ըստ օրենքի, իրենք իրավունք չունեն ստիպել բնակիչներին գույքահարկը վճարել ավելի շուտ, և գլխավոր խնդիրը հենց այն է, որ գումարը հավաքվում է տարեվերջին, իսկ տարվերջին անհնար է կատարել նախատեսվող աշխատանքները։ Նա նաեւ նշում է, որ Հադրութ համայքնում, օրինակ, ավտոմեքենաներից գանձվող գույքահարկը ընդհանուր գույքահարկի 60,7 տոկոսն է կազմում:

Վ. Սավադյանի կարծիքով հարցը հանրային նշանակություն ունի, սակայն պատկան մարմինների կողմից անտեսվում է ապրիլ ամսից և մինչ այսօր այդ ուղղությամբ քայլեր չեն ձեռնարկվում, ինչը լուրջ խոչնդոտներ է ստեղծում։

Շատ համայնքներում առանց այդ էլ ցածր եկամուտների պայմաններում տեղական ինքնակառավարման մարմինների գործունեության արդյունավետությունը կասկածի տակ է դրվում: Թեեւ համայնքն ու կառավարությունը միմյանց մեղադրում են տարբեր հարցերում, այնուամենայնիվ փաստ է մնում, որ համայնքային բյուջեների սեփական եկամուտների ավելացման եւ դրանց հավաքագրման խնդիրը թույլ չի տալիս տեղական ինքնակառավարման մարմիններին ավելի արդյունավետ գործել:

http://www.artsakhnow.am/%d5%a3%d5%b8%d6%82%d5%b5%d6%84%d5%a1%d5%b0%d5%a1%d6%80%d5%af%d5%ab-%d5%a9%d5%a5%d5%b4%d5%a1%d5%b6%d5%9d-%d5%be%d5%a5%d5%b3%d5%ab-%d5%a1%d5%bc%d5%a1%d6%80%d5%af%d5%a1-%d5%b0%d5%a1%d5%b4%d5%a1%d5%b5/