Башкортстан коронавирус буенча чикләүләрне бетерүнең икенче этабына әзерләнә.
Бу хакта бүген Хөкүмәттә оператив киңәшмә барышында төбәк Башлыгы Радий Хәбиров белдерде. Аның сүзләренә караганда, республикада чикләүләрне туктатуның икенче этабына күчү мөмкинлеге төсмерләнә.
"Әйдәгез, 1 сентябрьгә кадәр моны хәл итик. Безгә чикләүләрне бетерүнең икенче этабына ниндидер запас белән чыгарга кирәк, тагын да ныгынып һәм авырулар санын азайтып, — диде Хәбиров. — Әйе, чыннан да, күрсәткечләр буенча пневмония саны кими. Бу безнең өчен бик мөһим индикаторларның берсе һәм ул безгә яхшыга өметләнергә мөмкинлек бирә. Инфекция йоктыручыларның гомум саны буенча вәзгыять бер үк хәлдә, якынча, плюс-минус бер-ике кеше".
Төбәк Башлыгы иртәгә, 18 августта, коронавирус буенча оператив штаб утырышын уздырачак, анда транспортта, күпфункцияле үзәкләрдә, дәваханәләрдә, сәүдә учреждениеләрендә күрелә торган хәвефсезлек чаралары турында чыгышлар тыңланачак.
Шулай ук Радий Хәбиров алда, гадәттәгечә, ОРВИ һәм грипп авырулары арту белән катлауланачак эпидемиологик сезон тора, дип искәртте. Шуңа бәйле рәвештә ул республиканың Сәламәтлек саклау министрлыгына вакыйгаларның төрле үсешенә әзер булырга һәм тиешле санда ирекле койка фонды булуны күздә тотарга кушты.
Автор: Резеда Галикәева