Ինչո՞վ են զբաղվում նախկին նախարարները

artsakhnow.am-ը փորձել է պարզել, թե Բակո Սահակյանի նախագահության վերջին շրջանում պաշտոնավարած նախարարներից ով ինչով է զբաղվում:

Արայիկ Հարությունյանը պետական նախարար էր վերանշանակել Գրիգորի Մարտիրոսյանին, սակայն արդեն հայտնի է, որ առաջիկայում նա հրաժեշտ կտա իր պաշտոնին՝ Հաշվեքննիչ պալատի նախագահի պաշտոնը զբաղեցնելու համար:

Այսպես, նախարարի իրենց պաշտոններն են պահպանել Արտաքին գործերի նախարար Մասիս Մայիլյանը, Պաշտպանության նախարար Ջալալ Հարությունյանը, Էկոնոմիկայի նախարար Լևոն Գրիգորյանը: Նախարար է մնացել նաև Ժիրայր Միրզոյանը՝ Գյուղատնտեսության նախարարությունից տեղափոխվելով նորաստեղծ Տարածքային կառավարման և զարգացման նախարարություն: ԱՀ բնապահպանության եւ բնական ռեսուրսների նախկին նախարար Ֆելիքս Գաբրիելյանը ԱՀ բնապահպանության կոմիտեի նախագահն է: Բնապահպանության ոլորտը նախարարության կարգավիճակից իջեցվել է պետական այլ մարմնի կարգավիճակի: Պետական մեկ այլ մարմնի՝ կադաստրի և պետական գույքի կառավարման կոմիտե նախագահ է նշանակվել Քաղաքաշինության նախկին նախարար Կարեն Շահրամանյանը:

Աշխատանքի, սոցիալական հարցերի և վերաբնակեցման նախարար Սամվել Ավանեսյանն Արայիկ Հարությունյանի կողմից նշանակվել էր Աշխատանքի, սոցիալական և բնակարանային հարցերի նախարար, սակայն հուլիսի 15-ին անակնկալ պաշտոնանկ արվեց: Մեր հարցին թե ինչո՞վ է հիմա զբաղվում, նշեց, որ վայելում է ազատությունը, որևէ աշխատանքի չի անցել:

Մեզ չհաջողվեց կապվել Առողջապահության նախկին նախարար Արայիկ Բաղրյանի հետ, սակայն տեղյակ ենք, որ նա մեկնել է Երևան՝ մասնագիտական գործունեության: Մինչև Արցախում նախարար նշանակվելը նա ՀՀ Առողջապահության նախարարության «Առողջապահական ծրագրերի իրականացման գրասենյակ» պետական հիմնարկի տնօրենի պաշտոնակատարն էր:

Արդարադատության նախկին նախարար Արարատ Դանիելյանն այժմ նախագահի խորհրդականն է և Ազգային ժողովում նախագահի ներկայցուցիչը:

Կրթության, գիտության և սպորտի նախկին նախարար Նարինե Աղաբալյանը մեզ հետ զրույցում  նշել էր, որ այժմ դադար է վերցնում, նպատակ ունի վերադառնալ քաղաքականություն՝ չբացառելով համագործակցությունը ԱՀ նախկին նախագահ Բակո Սահակյանի հետ։

Մշակույթի և երիտասարդության հարցերի նախկին նախարար, դաշնակցական Լեռնիկ Հովհաննիսյանն ամենայն հավանականությամբ կդասավանդի Արցախի պետական համալսարանում, նա Հայոց պատմության և ազգագրության մասնագետ է:

Ֆինանսների նախկին նախարար, ԱՀ նախագահ Արայիկ Հարությունյանի հորեղբոր որդի Արթուր Հարությունյանն Ազգային ժողովի ամենամեծ «Ազատ Հայրենիք-ՔՄԴ» խմբակցության ղեկավարն է և ԱԺ Ֆինանսաբյուջետային և տնտեսական հարցերի մշտական հանձնաժողովի նախագահը:

http://www.artsakhnow.am/%d5%ab%d5%b6%d5%b9%d5%b8%d5%9e%d5%be-%d5%a5%d5%b6-%d5%a6%d5%a2%d5%a1%d5%b2%d5%be%d5%b8%d6%82%d5%b4-%d5%b6%d5%a1%d5%ad%d5%af%d5%ab%d5%b6-%d5%b6%d5%a1%d5%ad%d5%a1%d6%80%d5%a1%d6%80%d5%b6%d5%a5%d6%80/