212-ші Қара пайым-сөз: Мына індет біз тәубемізге түспейінше, беті қайтпай ма деп қорқа бастадым

«Тәжі-дерт»* күллі әлемді жайлап тоқтайтын түрі жоқ. Бүгінгі статистика бойынша (2020 жылғы 21-тамыз, жұма) әлемнің 188 елінде 22,5 миллион адам осы індетті жұқтырып, 792 мың адам көз жұмды. «Жасасын глобализация» деп дарбазасын айқара ашып тастаған қонақжай еуропа мемлекеттері, «батырға да жан керек» деп асығыс-үсігіс шекараларын қайта жауып жатыр. Бұған дейін талай індетті ауыздықтаған әлемнің тәжірибелі дәрігерлері қос қолымен бастарын ұстап «бұлай болуы мүмкін емес, неге бұл індет бұған дейінгі тәртіптердің бәрін тәрк етіп, қайта-қайта өрши береді» деп індетке шипа таба алмай шарасыздық танытып отыр. Шынында не болып барады өзі?! – деп ойланбаған адам жұмыр Жердің бетінде қалмаған шығар деп ойлаймын. Басқасын білмеймін, бірақ дәл осы індетті көп жылдардан кейін «құпиясы ашылмаған ақылды, ғажайып індет» деп атайтын сияқты. Себебі, қулық-сұмдығы көп адамзаттан бұл індет екі қадам ілгері ойлап, құрған тұзақтан сытылып шығып кетіп жатыр. Бұрын таңнан-кешке дейін жұмыста болып, не өзі де демала алмай, не бала-шағасына тәрбие де бере алмай, мұрнынан суы кетіп жүрген адамдар, енді міне алты ай бойы отбасымен бірге пәтерінде, үйінде қамалып отыр. Ұйқысы қанып, миы тыныққан адамдар «осы уақытқа дейін не істеп не қойғандарын ойланып», өмірге басқаша қарай бастағаны байқалады. Бұрын байқалмайтын мінсіз деп ойлап жүрген мемлекеттік жүйелердің осал-оғаш тұстары «ырсиып» көзге қораш көріне бастады. Сіздерді қайдам (әрқайсыңыздың өз пікіріңіз бар), өз басым соңғы кезде «осы індет адам баласы ойлансын, дұрыс шешім қабылдасын» деп Алланың бізге жіберген зор белгісі ме деп ойлана бастадым. Шынында да Жер бетінің қожайынындай талтаңдап кеткен адамзат баласы өзінің түкке тұрғысыз, қолынан поқ келмейтін пенде екенін түсінгенше, осы індет жалғаса беретін сияқты болып көрініп кетеді кейде. Сіздер не ойланып жүрсіздер, пікірлеріңізді білуге бола ма екен?

* Короновирус-COVID-19 сияқты аты жаман ауруларды қазақ «құтырып кетеді» деп атын атауға тыйым (ғылыми тілде – «табу») салғасын, оны «Тәжі-дерт» деп жазып жүрмін.