Այսօր, 2020թ. օգոստոսի 11-ին, Արցախի Հանրապետության Ազգային ժողովի արտահերթ նիստի օրակարգում է նաև «Պետական պաշտոններ զբաղեցնող անձանց վարձատրության մասին» օրենքում փոփոխություններ և լրացումներ կատարելու մասին օրինագիծը, որով բարձրացվում են մի շարք պաշտոնյաների աշխատավարձերը և սահմանվում է նոր ստեղծված պաշտոնների վարձատրության չափը: Այսպես, ԱԺ աշխատակազմի ղեկավարի աշխատավարձի դրույքաչափի համար սահմանվում է 9.60 գործակից նախկին 8-ի փոխարեն, սա նշանակում է, որ պաշտոնը զբաղեցնող անձը նախկին 400 հազար դրամի փոխարեն կստանա 480 հազար դրամ: ԱԺ աշխատակազմի ղեկավարի պաշտոնն այժմ զբաղեցնում է կառավարող «Ազատ Հայրենիք» կուսակցության նախկին պատգամավոր Ռոբերտ Ղահրամանյանը: Մինչև փոփոխություննը 9.60 գործակից էր սահմանված միայն ԱԺ մշտական հանձնաժողովի նախագահի, նախարարի, ԱԱԾ տնօրենի, Ոստիկանապետի և Քննչական կոմիտեի նախագահի համար: Այժմ այս ցանկին, բացի ԱԺ աշխատակազմի ղեկավարից, միացել են նաև ԱՀ հանրային ծառայությունները և տնեսական մրցակցությունը կարգավորող պետական հանձնաժողովի նախագահը (2020թ. հուլիսի 16-ից այս պաշտոնը զբաղեցնում է Արցախի ներդրումային հիմնադրամի նախկին գլխավոր տնօրեն Արտակ Միրզոյանը), ԱՀ պետական վերահսկողական ծառայության պետը (Ծառայությունը նոր կազմավորված մարմին է, այն ղեկավարում է «Ազատ Հայրենիք» կուսակցության նախկին պատգամավոր Հովիկ Ջիվանյանը, նշանակվել է 2020թ. հունիսի 24-ին), ԱՀ պետական եկամուտների կոմիտեի նախագահը (2020թ. հունիսի 1-ից պաշտոնը զբաղեցնում է Դավիթ Պողոսյանը, կոմիտեն ստեղծվել է Արայիկ Հարությունյանի նախագահ դառնալուց հետո, նախկինում այն կոչվում էր Կառավարությանն առընթեր հարկային պետական ծառայություն, հետո միացվեց ֆինանսների նախարարությանը), ԱՀ արտակարգ իրավիճակների պետական ծառայության տնօրենը (2020թ. մայիսի 26-ից այս պաշտոնը զբաղեցնում է Կարեն Սարգսյանը), ԱՀ կադաստրի և պետական գույքի կառավարման կոմիտեի նախագահը (2020թ. հունիսի 4-ից Կոմիտեի նախագահը 2010-2020թթ. ԱՀ քաղաքաշինության նախարար եղած Կարեն Շահրամանյանն է, Կոմիտեն գործում էր ԱՀ էկոնոմիկայի նախարարության ենթակայությամբ, Արայիկ Հարությունյանի նախագահ դառնալուց հետո Կառավարության կառուցվածքը փոխվեց և կոմիտեն առանձնացավ), ԱՀ բնապահպանության պետական կոմիտեի նախագահը (այս պաշտոնը հունիսի 10-ից զբաղեցնում է Ֆելիքս Գաբրիելյանը, որը 2018թ.-ից ԱՀ բնապահպանության եւ բնական ռեսուրսների նախարարն էր): Վերոնշյալ պաշտոնյաները նույնպես ստանալու են 480 հազար դրամ աշխատավարձ:
Բարձրացվել է նաև նախագահի աշխատակազմի որոշ պաշտոնյաների վարձատրությունը: Նույն 9.60 գործակցով են վարձատրվելու նաև ԱՀ նախագահի աշխատակազմի կառավարության գործերի կառավարչության պետը (Բակո Սահակյանի օրոք նախագահի աշխատակազմի ղեկավարի տեղակալ աշխատած Արայիկ Լազարյան), ԱՀ նախագահի աշխատակազմի ղեկավարի առաջին տեղակալը (վարչապետ Արայիկ Հարությունյանի օգնական, ապա պետնախարար Արայիկ Հարությունյանի աշխատակազմի ղեկավար աշխատած Արթուր Պետրոսյան), ԱՀ նախագահի գլխավոր խորհրդական-հատուկ հանձնարարություններով դեսպանը («Ազատ Հայրենիք» կուսակցության նախկին պատգամավոր Ռուդիկ Հյուսնունց), ԱՀ նախագահի գլխավոր խորհրդականը (Արցախի Հանրապետության նախկին փոխվարչապետ Արթուր Աղաբեկյան): Նրանց աշխատավարձի դրույքաչափը ևս 480 հազար դրամ կլինի:
Բարձրացվել են նաև տարբեր պետական մարմինների ղեկավարների տեղակալների, վարչության պետերի և այլ պաշտոնյաների աշխատավարձեր:
Արայիկ Հարությունյանը 2020թ. մայիսի 26-ին գործող կառավարության անդամների մասնակցությամբ հրավիրել է աշխատանքային ընդլայնված խորհրդակցություն, որտեղ ներկայացրել էր կառավարության նոր կառուցվածքը՝ ընդգծելով, որ դրանց արդյունքում պետական բյուջեն լրացուցիչ ծանրաբեռնվածություն չի ունենա:
Հիշեցնենք, որ արցախյան պաշտոնյաները 2020թ. հունվարից նաև պարգավճար են ստանում՝ աշխատավարձի մինչև 15 տոկոսի չափով: http://www.artsakhnow.am/%d5%a1%d6%80%d6%81%d5%a1%d5%ad%d5%b8%d6%82%d5%b4-%d5%b8%d6%80%d5%b8%d5%b7-%d5%ba%d5%a1%d5%b7%d5%bf%d5%b8%d5%b6%d5%b5%d5%a1%d5%b6%d5%a5%d6%80%d5%ab-%d5%a1%d5%b7%d5%ad%d5%a1%d5%bf%d5%a1%d5%be%d5%a1/