Պրոֆիցիտից դեֆիցիտ. Արցախի պետական բյուջեի ծախսերը կավելանան մոտ 15 միլիարդ դրամով

2020թ. օգոստոսի 11-ին Արցախի նախագահի նախաձեռնությամբ տեղի կունենա Արցախի Հանրապետության Ազգային ժողովի արտահերթ նիստը, որի օրակարգում է նաև «Արցախի Հանրապետության 2020թ. պետական բյուջեի մասին» օրենքում փոփոխություններ կատարելու մասին հարցը: Գլխավոր փոփոխությունը բյուջեի դեֆիցիտային դառնալն է: 2020թ. պետական բյուջեն ընդունվել էր պրոֆիցիտով (հավելուրդ), որը կազմում էր 108 միլիոն դրամից ավելի: Այժմ պետական բյուջեն աննախադեպ մեծ՝ 9,6 միլիարդ դրամը գերազանցող դեֆիցիտ (պակասուրդ) կունենա: Սովորաբար բյուջեի պակասուրդը ֆինանսավորելու համար կառավարությունն առևտրային բանկերից վարկեր է վերցնում: Այս օրինագծով ևս դեֆիցիտի ֆինանսավորման աղբյուր է նշվում փոխառու միջոցները:

2020թ. պետական բյուջեն, այսպիսով, ծախսերի գծով կկազմի 135,6 միլիարդ դրամ, եկամուտների գծով՝ 126 միլիարդ դրամ: 2020թ. պետական բյուջեն ներկայում գործող օրենքի համաձայն նախատեսված է եղել մոտ 120 միլիարդ դրամի շրջանակներում: Բյուջեի եկամտային մասի ավելացումը պայմանավորված է ՀՀ-ից ստացվող բյուջետային վարկի գումարի 5,1 միլիարդ դրամ ավելացմամբ:

14 միլիարդ 810 միլիոն դրամ ավելացած բյուջետային ծախսերը կատարվելու են հետևյալ ուղղություններով՝

-արտեզյան ջրհորների կառուցման ու ջրախնայողական տեխնոլոգիաների ցանցի ընդլայնման նպատակով նախատեսվում է «Գյուղատնտեսական միջոցառումների իրականացման ծրագրեր» ծախսային ծրագիրն ավելացնել 1,5 միլիարդ դրամով,

-«Արցախի Հանրապետության հյուսիս-արևելյան հողերի ոռոգումը Թարթառի հոսքով» ծրագրի իրականացման նպատակով 2020թ. համար նախատեսվում է «Ջրամբարների, ջրանցքների, ջրատարների վերանորոգում, վերականգնում և պահպանում» ծախսային ծրագիրն ավելացնել 2,5 միլիարդ դրամով,

-Արցախի չգազաֆիկացված բնակավայրերի բնակիչների կողմից սպառվող էլեկտրաէներգիայի սակագինը կսուբսիդավորվի 100 միլիոն դրամով՝ հնարավորություն տալով ծրագրի շահառու բնակչությանը մեկ կիլովատ ժամի փոխարեն վճարել 15 դրամ:

-գյուղերի ճանապարհների սալապատման ծրագիրը կավելացվի 710 միլիոն դրամով,

-առողջապահությանը տրվող գումարները կավելանան 400 միլիոն դրամով՝ հնարավորություն տալով բարձրացնել բուժաշխատողների աշխատավարձերը և որոշակի սոցիալական խմբի մեջ մտնող անձանց վիրահատություններն անվճար կազմակերպել,

-անվճար բարձրագույն և միջին մասնագիտական կրթության ներդրման համար կրթական ճախսերն ավելանալու են 200 միլիոն դրամով,

-2,9 միլիարդ դրամ է ուղղվելու պետական բյուջեի պահուստային ֆոնդի ավելացմանը՝ COVID-19 համավարակի տարածման կանխարգելման և  հետևանքների չեզոքացման նպատակով,

-«Կապիտալ ներդրումներ» ծախսային ծրագիրն ավելացվել է 6,5 միլիարդ դրամով:

http://www.artsakhnow.am/%d5%ba%d6%80%d5%b8%d6%86%d5%ab%d6%81%d5%ab%d5%bf%d5%ab%d6%81-%d5%a4%d5%a5%d6%86%d5%ab%d6%81%d5%ab%d5%bf-%d5%a1%d6%80%d6%81%d5%a1%d5%ad%d5%ab-%d5%ba%d5%a5%d5%bf%d5%a1%d5%af%d5%a1%d5%b6-%d5%a2%d5%b5/