159-шы Қара пайым-сөз: Қазақстан қазақ емес, орыс тілді мемлекетке айналып барады

P.S. Мені қайда жоғалып кетті деп таң қалып отырған шығарсыздар. Екі күннен бері бірінші рет жазбамды жүктеу мүмкін болып отыр. Бұған дейін жазбаларым парақшама жүктелмей қойды, жазғандарымды ешкім көрмейді. Нағыз «мылқау» мен «соқырдың» анекдоты сияқты бірдеме болды. Мына төмендегі жазба, жүктелмей, сақталып қалған жазба екен. Оқи отырыңыздар. Егер тағы құлыптап тастамаса иншаллаһ, жазармын. Аман-сау болыңыздар...

Қазақстан қазақ емес, орыс тілді мемлекетке айналып барады

Қазір Алматыда кім жоқ дейсің. Ұлымның сыныбында Юна деген жапон қызы бар. Өткен жылы әкесімен таныстым. Әйелі қазақ, Талдықорғанның қызы, найман. Әлгі жапон орыс тілінде сөйлейді. Осы көктемнен бастап бір ұзын бойлы тарамыс негр жігіті, ауламыздағы қазақ-орысы бар, бүкіл жас балдарды кәсіби түрде футбол ойнауға баули бастады. Бұл жаттығу үйреткені үшін ақы алмайды. Әйелі орыс, әлгі негрдің өзі орысша сөйлейді. Таза ауа жұту үшін балконға шыққанда, әрі-беріп өтіп жататын шетелдіктердің қай тілде сөйлеп бара жатқанын естимін. Бәрі орыс тілінде сөйлейді. Сонда біздің Үкімет қазақ тілін қатырып реформалаймыз деп айтқанда, нені айтып жүр. Қазақстан қазақ емес, орыстардың мемлекетіне айналып барады. Мен мұны жазып отырғанда мемлекетімізде ұлт араздығын қоздырайын деп немесе біреулердің ықпал-пікіріне еріп отырған жоқпын. Өз көзіммен көріп, өз құлағыммен естіген нәрселерімді жазып отырмын. Егер қаласа мемлекетіміз мені бір сәтте ұлтшыл, тіпті террорист етіп шығара алады. Оған шүбаланбаймын. Бірақ одан қазақ та, орыстар да, шетелдіктер де қазақ тілінде сөйлейтін ел болып кетсек, түрмеде шіруге дайынмын. Қысқасы біз расында тілінен, ділінен, барынан айырылған «мәңгүрт» елге космостық жылдамдықпен айналып барамыз. Тіпті ауладан арыға барып ойнамайтын өз перзенттерім, үйге орыс тілінде сөйлеп кіргенде, не істерімді білмеймін. Шынымен де білмеймін бұл дертке қандай ем барын. Не істейміз ағайын...