Արցախի հանրային հեռուստատեսության գործադիր տնօրենը նախագահի պահանջով ազատման դիմում է գրել

Արցախի հանրային հեռուստատեսության գործադիր տնօրեն Մերի Դավթյանը հրաժարականի դիմում է ներկայացրել։ Ինչպես նշված է նրա ֆեյսբուքյան գրառման մեջ, նման պահանջ ներկայացրել է Արցախի Հանրապետության նախագահ Արայիկ Հարությունյանը։ Նախագահի պահանջի պատճառը եղել է հեռուստատեսության կոլեկտիվում եղած բողոքները։ «Լրացուցիչ ճշգրտող իմ հարցին՝ արդյո՞ք երկրի ղեկավարը նախապատվությունը տալիս է հիմնարկը լճացման տանող ու կոմֆորտի զոնայից դուրս գալ չցանկացող խմբի բողոքին տուրք տալուն, թե՞ պրոֆեսիոնալիզմի իմ պահանջին, պատասխանը միանշանակ էր՝ այո’, ինձ համար կարևորը կոլեկտիվի համերաշխությունն է»-աշխատանքից ազատվելու դիմումի նախապատմություն է ներկայացնում իր գրառման մեջ Մերի Դավթյանը։ Գրառման մեջ նա նաև տեղեկացնում է, որ ընդունել է ազատման դիմումի պահանջը։

Նշենք, որ համաձայն ԼՂՀ Հեռուստատեսության և ռադիոյի մասին օրենքի, Արցախի նախագահը հեռուստատեսության գործադիր տնօրեն հանել-նշանակելու կամ ազատման դիմում պարտադրելու որևէ լիազորություն չունի։ Հանրային հեռուստառադիոընկերության ղեկավար մարմինը Հանրային հեռուստառադիոընկերության խորհուրդն է, որն էլ, համաձայն օրենքի, Հանրային հեռուստաընկերության և Հանրային ռադիոընկերության գործադիր տնօրեններին նշանակում է մրցութային կարգով: Հանրային հեռուստաընկերության և Հանրային ռադիոընկերության գործադիր տնօրենները պաշտոնի են նշանակվում և իրենց պաշտոններից ազատվում են Խորհրդի անդամների ձայների երկու երրորդով:

http://www.artsakhnow.am/%d5%a1%d6%80%d6%81%d5%a1%d5%ad%d5%ab-%d5%b0%d5%a1%d5%b6%d6%80%d5%a1%d5%b5%d5%ab%d5%b6-%d5%b0%d5%a5%d5%bc%d5%b8%d6%82%d5%bd%d5%bf%d5%a1%d5%bf%d5%a5%d5%bd%d5%b8%d6%82%d5%a9%d5%b5%d5%a1%d5%b6-%d5%a3/