205-ші Қара пайым-сөз: Адамдардың тағдыры қандай алгоритм бойынша есептелетіні ашылмайтын құпия

Бүкіл ғаламторды шулатқан жай болған соң, осы қазір ғана: https://voxpopuli.kz/budte-vy-proklyaty-so-svoej-vlastyu-blagami-i-dengami-chem-zapomnilsya-ajsultan-nazarbaev/?utm_referrer=https%3A%2F%2Fzen.yandex.com&utm_campaign=dbr сілтемесі бойынша осы тақырыпқа жазылған мақаланы оқып шықтым. Көзім бір нүктеге түйіле қадалғанмен, нота жазған сазгер сияқты, саусақтарым өз-өзінен компьютер тақтасының үстінде зыр жүгіріп жүр. Өте ауыр жағдай, адам басына бермесін. Мына жалған дүниеде тіршілік етіп жүргенде бәріміз де «пендеміз». Сөйтсе де сәт сайын өзгеріп, төңкеріліп, жыртылып, айырылып жатқан дүниеде «адам сияқты өмір сүрсем» деп армандамайтын пенде жоқ. «Адам сияқты» деген сөздің астарында, әрине «бірнеше миллиард долларым болса, өйтер едім, бүйтер едім» және т.т. деген ашкөз ашқарақтық ойлар жатыр. Нақты уақыт режимінде бір сәтте әрі мыңғырған бай болып, әрі сүттен ақ, судан таза болып өмір сүру тек қияли кинолар мен ертегілерде ғана болатын жағдай. Шынайы өмірде таңдау үшеу ғана: миллиардтаған адамдар мына пәни жалғанда сіңірі шыққан кедей болады, миллиондаған адамдар орташа өмір сүреді, саусақпен санарлық адамдар ғана жоғарыдағы мақаладағы кейіпкерлер сияқты асқан бай болады. Алла Тағала адамдардың тағдырын қандай алгоритм бойынша таңдайтыны ешқашан ашылмайтын құпия. Басқалар туралы бірнәрсе айтуға құқым жоқ, бірақ өз басым Алладан ешқашан да жоғарыдағыдай тағдырды сұрамас едім. Ең дұрысы жаман-жәутік перзенттерімді шамам келгенше бағып-қағып өсіріп, солардың көз алдында сіңірім шыққан кедей болып тыныш өлгенім дұрыс деп ойлаймын.