Осыдан бір жыл бұрын (2019 жылғы 30-31 тамыз) «Blakcberry» атты Атыраудың түнгі клубында https://neonomad.kz/polugolye-devushki-tancevali-striptiz-pod-kjuj/ жартылай жалаңаш екі стриптизерша (stripper) қыз қазақтың «Адай» күйіне тайраңдап билеп жатқанда, құлдықтың құлдырауына түскен қазақтың масаң жігітінің бұл көрініске мәз болып «ыржыңдауы» қанымды басыма шаптырған еді. Артынан клуб басшылығы кешірім сұрады, өйтті-бүйтті дегеннің бәрі, мемлекеттің идеологиялық саладағы бұл топастығын ешбір ақтай алмасы анық. Бұл көрініс қазақ қоғамының құлдыраудың шырқау шегіне жеткенін көрсетеді. Жалпы күллі әлемді жайлап, адамзатты жегі құрттай іштен шіріткен бұл жаман құбылыс қалай пайда болды? Қит етсе бәрін еврейлерге жабатын жаман әдетіміз бар. Бірақ дәл осы жолы, адамзатты мыңдаған жылдар бойы адам етіп келген құдіретті де қасиетті музыканы қорлаған ебекеңдер емес еді. Оның тарихы былай басталған. Шамамен 1893-1985 жж. арасында Ұлыбританияны шайқалтып-теңселткен шахтерлардың тоғыз үлкен ереуілі болғаны белгілі. Капиталистер жұмысшыларды қалай ауыздықтауды білмей басы қатып отырғанда, араларындағы бір ғұлама «шахтерлардың миын музыкамен улау керек» деген идея айтады. Содан бастап классикалық музыка сүтке тиген мысықтай күй кеше бастады. Есесіне әлемді өзгертеді деп Маркс-Энгельс-Ленин-Сталин (МЭЛС) сонша үміт еткен пролетариат – рок-н-ролл (1940-1950), блюз рок, фолк-рок, кантри-рок, джаз-рок фьюжн (1960), прогрессив-рок, глэм-рок, хэви-металл, панк-рок (1970), пост-панк (1980), гранжа, брит-поп, инди-рок (1990) және т.т. құлына айналып кете барды. Осыдан бастап пролетариат уақытын күндіз жұмыста, түнде клубта өткізетін болды. Бүгінгі Белорусия патшасы Лукашенко өз халқымен емес, В.Цойдың рок-музыкасына еліккен фанаттарымен қырылысып жатқанын әлі түсінбей отыр. Ресей патшалығы да осыны түсінбей, оппозиционер Навальныйға «у» беріп, басы бәлеге қалды. Егер Қазақстан осы даңғаза музыка саласын реттемесе, көп ұзамай басы бәлеге қалатыны даусыз. Құран Кәрімде Қияметтің үлкен белгілерінің бірі күллі әлемді даңғырлаған музыкасымен жаулап алатын «Яжуж-Мажуж» деп тектен-текке көрсетпеген. Бірақ көңілімнің түкпірінде Уханнан (Қытай) таралған «вирус» сияқты, күллі әлемге таралып «құлақтан кіріп сананы өшіріп жатқан» бұл пәлекеттен енді құтылуымыз қиын-ау деп ойлаймын...